Il-Ministri Taljani dikjaraw stat ta’ emerġenza – valida għal sitt xhur – b’reazzjoni għall-ammonti kbar tal-immigranti li qegħdin jaqsmu l-Mediterran mill-Afrika ta’ Fuq. Id-dikjarazzjoni tippermetti l-allokazzjoni ta’ ħames miljun ewro bħala fondi mingħand il-Gvern Taljan minbarra li tikkoinċiedi mal-wasla ta’ 3,000 immigrant fl-Italja fi tlett ijiem biss.
Fl-aħħar ġranet diversi dgħajjes wasslu lill-mijiet tal-immigranti fil-gżira ta’ Lampedusa, bil-gwardjani tal-kosta i jsalvaw xi 2,000 ruħ mill-Ġimgħa ‘il hawn. Sadanittant, in-Nazzjonijiet Uniti reġistrat l-ogħla numru ta’ imwiet fost l-immigranti mill-2017 – u biċ-ċifri juru li tilfu ħajjithom ‘il fuq minn 440 fiz-zoni ċentrali tal-Mediterran waqt l-ewwel tliet xhur tas-sena.
Fl-aħħar traġedja mietu talanqas għaxar immigranti mill-Afrika barra l-kosta tat-Tuneżija, b’għexieren oħra jkunu salvati ‘il hinn mill-belt tal-port ta’ Sfax.
Dan meta t-Tuneżija saret l-akbar punt tat-tluq għad-dgħajjes mgħobbijin bl-immigranti peress li tinsab 185 kilometru biss ‘il bogħod minn Lampedusa.
Bħalissa, it-Tuneżija tinsab f’morsa ta’ kriżi finanzjarja u l-ispinta fil-vjaġġi bl-immigranti li jridu jaslu l-Ewropa żdiedet mindu l-President Tuneżin Kais Saied akkuża lill-immigranti tal-Istati taħt is-Sahara b’li qed ‘jikkontribwixxu għal mewġa ta’ kriminalità’ f’pajjiżu. Dan waqt li n-NU akkużat lil Saied dwar kummenti li jqanqlu l-mibgħeda għal razza ta’ nies partikulari.
Min-naħa tiegħu , Nello Musumeci, bħala l-Ministru Taljan responsabbli mill-Affaraijiet Marittimi u Protezzjoni Ċivili, tkellem dwar żieda ta’ 300 fil-mija fl-influss tal-immigranti u sostna li l-Italja qed tiffaċċja ‘emerġenza assoluta’ minħabba l-piż u l-elementi ta’ sogru għall-infrastruttura bażika tal-pajjiż.
Musumeci qal li qatt qabel ma kien hawn fenomenu daqstant kbir ta’ immigrazzjoni u li l-istat tal-emerġenza li ddikjarat l-Italja mhux se jkun biżżejjed biex isolvi l-problema. Dan ukoll meta l-Gvern Taljan qed jitlob għal intervent responsabbli min-naħa tal-Unjoni Ewropea peress li ‘ma jiflaħx aktar għall-movimenti kontinwi tal-immigranti’.
