L-Istati Uniti qed tinvestiga leak ta’ informazzjoni li tindika l-preżenza tal-qawwiet speċjali tar-Renju Unit u ta’ pajjiżi oħra fl-artijiet tal-Ukrajna.
L-Ukrajna ilha minn Frar tal-2022 tirreżisti l-invażjoni mill-Armata tar-Russja u l-informazzjoni, ftit jew wisq, tikkonferma l-ispekulazzjoni li fl-artijiet Ukreni hemm il-qawwiet minn barra li qegħdin jgħinu lis-suldati lokali biex jiġġieldu, b’suċċess, kontra l-militar tal-Kremlin.
L-informazzjoni hi inkluża f’għexieren ta’ dokumenti li ħarġu online u li wħud kienu mmarkati ‘Top Secret’. Id-dokumenti jiddettaljaw aspetti tal-gwerra li għaddejja fl-Ukrajna waqt li jiżvelaw data sensittiva dwar it-tħejjijiet tal-qawwiet Ukreni għal kontro-offensiva kbira li kapaċi sseħħ fil-jiem li ġejjin.
Skont id-dokument bid-data 23 ta’ Marzu, ir-Renju Unit għandu l-akbar kontinġent ta’ qawwiet speċjali fl-Ukrajna. Intant, fl-artijiet Ukreni hemm anki preżenza ta’ qawwiet speċjali oħra li ġejjin mill-Istati Uniti, Franza. il-Latvja u l-Olanda.
Madankollu, id-dokument ma jgħidx fejn jinsabu dawn il-qawwiet inkella x’qegħdin jagħmlu fl-Ukrajna. Intant, il-qawwiet speċjali ta’ kull pajjiż qegħdin hemm biex jaqdu funzjoni speċifika– u fl-aħħar sigħat kienet mistennija reazzjoni qawwija mingħand ir-Russja li ilha targumenta li ‘qed tikkonfronta anki lill-qawwiet tan-NATO fl-artijiet Ukreni’.
Il-Ministeru tad-Difiża Britanniku ma kummentax dwar l-informazzjoni li suppost hi klassifikata iżda tenna, fuq Twitter, li d-data għandha titqies bħala ‘impreċiża għall-aħħar’ waqt li teħtieġ tkun trattata bħala ‘misinformazzjoni’.
Madankollu, uffiċjali mal-Pentagon ta’ Washington qed jirribattu li d-dokumenti huma ġenwini – anki jekk dokument partikulari li jirreferi għall-vittmi tal-gwerra fl-Ukrajna jidher li kien immanipulat skont l-aġenda ta’ persuni mhumiex magħrufa.
