Hekk kif riħ qawwi kien ta’ preżenza u xkiel kontinwu fil-Matthew Micallef St John Stadium, it-tamiet għal riżulati b’saħħithom kienu xi ftit limitati, iżda l-folla preżenti xorta kellha l-opportunità li tesperjenza żewġ prestazzjonijiet mill-aqwa li rriżultaw f’rekords nazzjonali ġodda.
Proprju fl-aħħar avveniment tat-tielet Open Challenge Meeting ta’ Athletics Malta, Luke Micallef kompla bil-wirjiet b’saħħithom tul dan l-istaġun, meta din id-darba fit-3000m steeplechase kiseb ħin ta’ 9.09.00, sekonda aħjar minn dak meħtieġ biex jikkwalifika għal-Logħob tal-Pajjiżi ż-Żgħar (MQS). Għall-atleta ta’ Pembroke, dan il-ħin fisser rekord nazzjonali ġdid, titjib impressjonanti ta’ disa’ sekondi fuq dak preċedenti li huwa kien stabbilixxa f’Lulju li għadda waqt il-Kampjonat Nazzjonali.
Aktar kmieni fil-ġurnata, Nicolai Bonello ta’ La Salle tejjeb ir-rekord nazzjonali tal-pole vault b’qabża ta’ 4.45m. Għal Bonello, din kienet it-tieni darba dan l-istaġun li tejjeb dan ir-riżultat. Fost it-tfajliet, Sana Grillo rebħet b’3.30m.
Fost l-aktar tlielaq eċitanti tal-ġurnata, Janet Richard (Pembroke A) rebħet dik tal-400m b’mod konvinċenti f’ħin ta’ 54.39s, ħin li wkoll jilħaq l-MQS tal-GSSE. L-isfida għall-post fit-tim nazzjonali tar-relay tan-nisa tal-4×400 kompliet tiżvolġi b’mod interessanti hekk kif Kay Testa, ta’ Pembroke wkoll, irreġistrat 58.63s, ħin mill-aktar inkoraġġanti minkejja r-riħ.
It-tellieqa tal-irġiel ukoll kienet waħda missielta b’Luke Camilleri ta’ Pembroke jirreġistra l-aqwa ħin tal-ġurnata b’50.39s quddiem sieħbu tat-tim Steve Camilleri b’50.53s. Anke hawn, kollox għadu miftuħ biex ikun deċiż il-kwartett li se jilbes il-flokk aħmar u abjad fil-GSSE.
Fil-javelin, Joanne Vella (Pembroke A), stabbilixxiet rekord tal-kategorija Over 35 b’tefa’ ta’ 40.05m.
Wara dan l-avveniment, l-atleti issa fadallhom tliet opportunitajiet oħra li jiksbu post fil-Logħob tal-Pajjiżi ż-Żgħar, żewġ Challenge Meetings oħra, u l-Kwalifikazzjoni Finali fl-1 ta’ Mejju.
