Matul tmiem il-ġimgħa tal-Għid, it-tim ta taħt il-ħmistax-il sena tat-tfajliet ta’ Luxol Basketball Club ħa sehem f’tournament internazzjonali ġewwa l-Italja. It-tournament organizzat minn EuroCamp Cesenatico kien qiegħed jospita ‘l fuq minn 120 team f’diversi kategoriji taż-żgħażagħ kemm maskili kif ukoll femminili u kien organizzat f’diversi basketball courts ġewwa ż-żona ta Cesena, Cesenatico, Cervia u Rimini.
It-tim ta Luxol ħa sehem fil-kategorija ta taħt il-ħmistax-il sena li fiha kienu qed jieħdu sehem seba’ timijiet fosthom timijiet min ġewwa r-reġjuni ta’ Toscana, Lombardia u Piemonte. Ta min jgħid li t-team kien magħmul minn elementi ta’ bejn it-tnax u l-erbatax-il sena u kien fost l-iżgħar fit-tournament kollu. Il-polza poġġiet lil Luxol fi Grupp A ma’ Virtus Siena, CSC Corsico u PT Medolla 2008. Fl-ewwel logħba Luxol lagħbu kontra t-tim stabbilit ta Virtus Siena, li jinsab fit-tieni post fir-reġjun tat-Toscana u li kkwalifika għall-fazi tal-interzona. F’din il-partita Luxol kellhom wirja tajba għalkemm ħarġu telliefa bl-iskor ta’ 41-53. Fit-tieni ġurnata tal-kompetizzjoni, it-tim ta Luxol kellu żewġ partiti kontra CSC Corsico u PT Medolla li fihom ħarġu rebbieħa bl-iskor ta’ 75-46 u 68-47 rispettivament. Dawn iż-żewġ rebħiet poġġew lit-tim fit-tieni post tal-klassifika fi Grupp A u b’hekk ikkwalifika għas-semi-finali.
Fis-semi-finali, l-avversarji ta’ Luxol kienu it-tim ta ABA Pink min Lombardia li kienu rebħu Grupp B mingħajr telfa. B’wirja qalbiena ż-żgħażagħ Maltin irnexxielhom jirbħu din il-partita bl-iskor ta’ 52-34 biex kontra kull mistenni kkwalifikaw għall-finali fejn kellhom jerġgħu isibu lit-tim ta Virtus Siena. L-ewwel taqsima tal-finali kienet ferm kombattuta bit-tim ta Luxol iżomm il-pass ma’ dak ta’ Siena iżda mbagħad il-freskezza u l-qawwa fizika ta’ Virtus Siena kienet wisq għat-tfajliet Maltin li fl-aħħar ħarġu telliefa bl-iskor ta 40-56. Madankollu r-riżultat kien wieħed sodisfaċenti li jawgura tajjeb għall-futur ta’ dan il-grupp.
Fi kliem il-kowċ ta’ Luxol li mexxa din l-espedizzjoni Roderick Vella, esperjenzi internazzjonali bħal din huma ferm importanti għaż-żgħażagħ Maltin għaliex permezz tagħhom dawn iħabbtu wiċċhom mar-realtà ta’ basketball iktar kompettitiv u ta’ livell iktar għoli u fl-istess ħin ikollhom l-opportunità li jgawdu l-isport mil-lenti kulturali kif ukoll soċjali.
