Colin Schembri
Starlites Naxxar………..91
Depiro Blue……………..70
(18-9)(27-17)(28-15)(18-29)
Starlites għamlu d-double fil-kategorija ta’ taħt it-23 sena fejn wara s-suċċess tan-nisa, huma rebħu wkoll il-kampjonat tal-irġiel wara rebħa fuq Depiro 91-70. Starlites għelbu lil Hibs 83-57 fis-semi-finali fil-waqt li Depiro eleminaw lill-Athleta 81-70. B’diversi players li jimmilitaw ukoll fil-kampjonat tal-ewwel diviżjoni, il-partita kienet f’idejn Starlites għal ħin twil u kien biss fl-aħħar sessjoni li Depiro għamlu l-iskor aktar rispettabli speċjalment bil-punti kontinwi minn Luke Attard. Kien biss wara l-ewwel attakk li Depiro kienu minn fuq fil-partita wara trippla minn Miguel Brincat. Wara li Starlites għamlu sitt punti oħra, Depiro kellhom risposta minn Georgi Lebanidze b’żewġ baskets konsekuttivi. Starlites komplew bi break ta’ 10-2 bil-punti fost l-oħrajn minn Jack Zammit u Miguel Fabri biex temmew l-ewwel sessjoni 18-9 minn fuq. Fit-tieni taqsima, Starlites komplew ikabbru l-vantaġġ wara sensiela ta’ trippli minn Ian Felice Pace, Fabri u Luca Riolo. Depiro wieġbu bl-ewwel trippla minn sitta ta’ Luke Attard flimkien ma’ Brincat u Michael Debattista. Felice Pace wieġeb għal Starlites b’żewġ trippli oħra biex fil-halftime huma kienu 45-26 minn fuq.
Wara l-intervall, Depiro fetħu bi trippla ta’ Miguel Mallia però kellhom isofru run oħra ta’ 12-0 minn Starlites. Huma kellhom it-trippli minn Matthew Scerri u Felice Pace flimkien ma’ Zammit u Louie Farrugia. Iż-żewġ timijiet irrispondew lil xulxin għal xi ħin biex Starlites kellhom vantaġġ ta’ 32 punt fi tmiem it-taqsima 73-41. Fl-aħħar sessjoni, Starlites dehru ċerti mir-rebġa u dan wassal biex Depiro tellgħu total ta’ 29 punt li 22 minnhom ġew kollha minn Attard fosthom b’ħames three pointers. Starlites kellhom punti minn players ta’ fuq il-bank bħal Sebastien Pace, Neil Sultana u Bojan Stankovic biex huma ħarġu rebbieħa 91-70. Fi tmiem il-partita l-President tal-MBA Paul Sultana ppreżenta t-trofew ta’ Champions lil captain ta’ Starlites Matthew Scerri fost il-ferħ tal-partitarji tagħhom.
Starlites Naxxar: J.Zammit 6, M. Barbara 1. I. Felice Pace 22, M. Fabri 13, L. Riolo 7, M. Scerri 10, S. Aquilina, L. Farrugia 18, S. Pace 2, N. Sultanta 6, B. Stankovic 6.
Depiro Blue: S. Galea 5, J. Micallef, L. Attard 25, A. Attard 2, S. Kenely, M. Brincat 13, M. Mallia 9, A. Micallef, M. Debattista 10, G. Lebanidze 6.
Referees: Nicky Azzopardi, Ivica Simic, Bogdan Mrkojevic
