Il-parlament Malti llum sellem lill-ex deputat Nazzjonalista Anne Agius Ferrante li kienet l-ewwel deputat Nazzjonalista u li mietet ftit ilu.
Fdi iċ-ċerimonja tkellmu l-Ispaker Anġlu Farrugia, id-Deputat Prim Ministru Chris Fearne u l-Kap tal-Oppożizzjoni Bernard Grech.
Il-Kap tal-Oppożizzjoni Bernard Grech qal li Anne Agius Ferrante kienet teżor kbir għall-familjari u l-ħbieb u sostna li hi kienet deputat mara fi żminijiet diffiċli biex in-nisa jikkontestaw għaliex is-soċjetà kienet għadha tikkunsidra lill-mara li postha kien id-dar u mhux fil-politika.
Għalhekk l-isforz ta’ Anne Agius Ferrante kien jirrigwarda sforz ikbar tant li kien diffiċli ssib min jaħdem għaliha fid-distrett. Kien diffiċli għal mara biex tirbaħ il-fiduċja tan-nies, sostna Bernard Grech, li kompla li l-familja tagħha kienet involuta fil-PN tant li ħuha kien Speaker tal-parlament.
Anne Agius Ferrante kienet baqgħet tippersisti għaliex kienet temmen li kellha tkompli tagħmel il-ġid u kienet strumentali biex iktar nisa jikkontestaw. Kienet issostni li sehem il-mara kien importanti ħafna fil-politka u kienet taħdem biex il-familji jgħelbu l-isfidi li jiffaċċjaw.
Hi kienet temmen ħafna fid-drititjiet fundamentali tal-bniedem u fl-indafa fil-politika, sostna Bernard Grech, li kompla li kienet temmen li Malta kellha tissieħeb fl-UE. Hu qal li Agius Ferrante kienet mara ta’ valuri u fl-1987 kienet appellat biex l-elettorat jitlob u jagħmel kuraġġ għaliex dan kien bżonnjuż f’dawk iż-żminijiet.
Id-Deputat Prim Ministru Chris Fearne qal li Anne Agius Ferrante kienet lesta tiddefendi b’mod qawwi dak li kienet temmen fih. Hu sostna li Anne Agius Ferrante kienet soda fit-twemmin tagħha u kienet waħda mill-pijunieri tad-deputati nisa.
Hi kienet l-ewwel mara eletta f’isem il-PN fl-1980 b’elezzjoni każwali meta kien hemm biss tliet deputati nisa b’kollox. Minkejja li għaddew is-snin, u għal snin twal, is-sitwazzjoni ftit inbidlet, sostna d-Deputat Prim Ministru, li kompla li llum hawn sitwazzjoni ferm differenti b’ekwilibriju bejn is-sessi fil-parlament.
