Kulħadd jiftakar l-istorja xokkanti tal-qtil ta’ mara anzjana ta’ 94 sena mill-klieb tan-neputi tagħha stess… każ li kien kexkek nazzjon sħiħ għall-mod brutali kif inqatlet din il-mara.
Issa iktar minn sentejn wara… sid il-klieb, Andre Galea safa attakkat minnhom stess tant li spiċċa rikoverat l-Isptar minħabba l-ġrieħi li ġarrab.
L-inċident seħħ kmieni t-Tnejn filgħodu meta Galea li għandu 37 sena safa attakkat quddiem ir-residenza tiegħu stess fi Triq Antonio Sciortino fl-Imsida, mill-klieb… tant li kellu jitla’ fuq saqaf ta’ karozza biex jeħles minnhom.
Għall-ħabta tas-1.30 ta’ filgħodu l-ġirien semgħu lir-raġel jgħajjat għall-għajnuna quddiem daru. B’persuna li kienet preżenti qalet li l-klieb kienu litteralment qed jiekluh… b’kelb tar-razza pitbull ta’ lewn abjad beda jattakkah f’wiċċu u idejh.
Ftit wara fuq il-post waslu l-Pulizija… b’uffiċjali mill-Animal Welfare ħadu l-klieb magħom ftit tal-ħin wara.
It-Tnejn filgħodu Net News mar fuq il-post fi Triq Antonio Sciortino fejn mal-art fid-daħla tar-residenza ta’ Andre Galea kien hemm ammont ta’ demm kif ukoll boroz kbar bojod imċappsa bid-demm. Kien hemm id-demm ukoll fuq il-karozza fejn tela’ Andre Galea sabiex jipproteġi ruħu mill-klieb.
Lura meta kien seħħ il-qtil f’Settembru tal-2020, persuni li tkellmu ma’ Net News kienu stqarrew li l-klieb kienu jitħallew bil-ġuħ, aktarx biex umbagħad jintużaw għall-ġlied illegali. Fil-fatt, ma kienx eskluż li l-anzjana kienet aggredita miż-żewġ pitbulls għaliex proprju inzammu f’dan l-istat.
Jidher li wara l-kaz tal-qtil ta’ Inez Galea, Andre Galea baqa’ qatt ma ġie investigat b’rabta ma’ każ ta’ moħqrija tal-annimali.
