Fl-2019, wara li l-Air Malta suppost għamlet ftit aktar minn miljun ewro fi profitti, il-Gvern Laburista kien qalilna li għandu viżjoni għal-linja nazzjonali tal-ajru.
Dak iż-żmien il-Ministru tat-Turiżmu Konrad Mizzi kien għamel ħiltu kollha sabiex il-poplu jemmen li l-AirMalta kienet qabdet it-triq tas-suċċess. Iżda illum kulħadd huwa konxju li l-pjan tiegħu u tal-amministrazzjoni Laburista kien falla qabel biss beda.
Dak iż-żmien, l-eks Ministru Konrad Mizzi kien saħansitra insista li taħt il-Labour l-Air Malta kienet se ttir lejn l-Indja u l-Istati Uniti.
F’dan l-istess perijodu, il-Partit Laburista kien qed idaħħal in-nies tiegħu jaħdmu fl-AirMalta…bil-pagi jiżdiedu sproporzjonalment … u bil-konsegwenza li tniżżlet għarkuptejha darba għal dejjem. Fost dawn, kien hemm ħafna minn tal-qalba fil-Labour illi sabu job mal-linja nazzjonali – f’din il-lista, hemm anke l-propagandista tal-media Laburista Karl Stagno Navarra.
Dan kien ukoll iż-żmien meta tfaċċa l-President Emeritu George Abela, li tul is-snin baqa’ jagħti konsulenza lill-Gvern biex jindirizza l-kwistjonijiet tal-ħaddiema. B’Konrad Mizzi kien ikkonvinċa lill-impjegati…illum ħafna minnhom imkeċċija mil-linja tal-ajru…li l-viżjoni tagħhom għall-Air Malta…kienet waħda ta’ suċċess.
Issa, wara dan il-ftaħir kollu, l-aħħar 300 ħaddiem li għadhom impjegati mal-AirMalta ukoll għandhom il-futur tagħhom f’inċertezza kbira.
