Colin Schembri
Fusion Meridianbet………82
Mellieħa Libertas………….65
(11-11)(23-13)(30-21)(18-20)
Fusion Meridianbet rebħu t-tieni unur tal-istaġun hekk kif wara s-suċċess fl-MBA Shield rebħu wkoll il-Bank of Valletta Knock-out dejjem kontra Mellieħa Libertas din id-darba bi skor akbar ta’ 82-65. Partita li rat lil Mellieħa jkollhom l-aħjar bidu fejn trippla ta’ Shawn Pace poġġiethom 7-2 minn fuq. Fusion mall-ħin bdew jirkupraw tant li kellhom żewġ trippli minn Viktor Capkanovski u ppareġjaw 11-11 u b’dan l-iskor intemmet l-ewwel taqsima. Fit-tieni perjodu Fusion bew jinqatgħu fuq quddiem hekk kif għamlu run ta’ 14-4 bit-three pointers minn Nikola Bozovic u Stefan Vincic. Ir-risposta ta’ Mellieħa ġiet minn Pace flimkien ma’ Karlis Diediskis u trippla ta’ Eduardo Valdespina għal skor ta’ 22-25. Bozovic għamel trippla oħra għal Fusion flimkien mal-punti ta’ Nikola Tosic biex daħlu jistrieħu 34-24 minn fuq.
Fit-tielet sessjoni, Fusion reġa’ kellhom bidu qawwi fejn wara li sofrew l-ewwel basket ta’ Mellieħa minn Clive Perreira, għamlu run ta’ 15-4 fejn Bozovic kompla għaddej bill-punti flimkien ma’ Bogdan Mrkojevic biex fetħu distakk ta’ 19 -il punt 49-30. Fusion komplew bi tlett trippli minn Mrkojevic u Bozovic u għalkemm kien hemm risposta minn Mellieħa, Fusion żammew vantaġġ komdu fi tmiem ir-raba’ perjodu 64-45. L-aħħar taqsima kienet l-akar waħda bilanċjata hekk kif iż-żewġ timijiet bdew jirrispondu lil xulxin kontinwament. Kien hemm spazju għal żewġ trippli minn Rytis Rutkauskas għall-Mellieħa però Fusion kellhom vantaġġ li setgħu jikkontrollaw sat-tmiem biex ħarġu rebbieħa 82-65. Fi tmiem il-partita, il-President tal-MBA Paul Sultana flimkien ma’ Stefan Abela f’isem il-Bank of Valletta ppreżentaw it-trofew ta’ MVP lil Nikola Bozovic ta’ Fusion u t-tazza lil captain ta’ Bogdan Mrkojevic.
Fusion Meridianbet: N. Pjanovic, S. Vincic 11, B. Mrkojevic 32, N. Tosic 6, N. Mihailovic 3, L. Sobers 2, V. Capkanovski 18, N. Rosic.
Mellieħa Libertas: S. Pace 8, R. Rutkauskas 10, P. Morata 8, C. Perreira 4, E. Valdespina 17, C. Briffa 8, D. Militello, K. Diediskis 4, M. Sampo 6, J. Jagna, K. Micaller 2.
Referees: Gordon Barbara, Nicky Azzopardi, Fanni Fabok
