Colin Schembri
Caffè Moak Luxol……………69
Hibernians………………………59
(24-15)(12-12)(15-13)(18-19)
Wara waqfa ta’ diversi ġimgħat, Caffè Moak Luxol irritornaw għal logħob u għamlu dan bl-aħjar mod hekk kif fil-finali tal-Mapfre MSV Life Knock-out għelbu lil Hibernians 69-59. Hibs għamlu minn kollox biex jippruvaw jieħdu dan l-unur li rebħu għal 18 -il darba fl-istorja tagħhom però Luxol kienu kontinwament fuq quddiem u żammew il-vantaġġ tul il-partita kollha. Il-partita kellha bidu bilanċjat bil-punti jiġu fuq iż-żewġ naħat biex Luxol kellhom vantaġġ minimu ta’ punt 8-7. Hawn il-players ta’ Santino Coppa għamlu run ta’ 10-2 bi three pointers minn Gladiana Avila u Mandi Mercieca biex fetħu vantaġġ doppju 18-9. Hibs kellhom risposta minn Iona Agius però punti minn Avila, Mercieca u Josephine Diaby raw lil Luxol itemmu l-ewwel taqsima 24-15 minn fuq. Fit-tieni sessjoni kien hemm trippla fuq kull naħa minn Avila u Samantha Brincat bil-Luxol ikomplu b’ħames punti oħra għal skor ta’ 32-20. Hibs wieġbu bil-punti ta’ Kenyotta Jenkins u Ashleigh Van Vliet biex Luxol daħlu jistrieħu 36-27 minn fuq.
Fit-tielet perjodu Hibs waslu sa’ sitt punti ‘l bogħod wara trippla oħra ta’ Brincat. Luxol irkupraw u għamlu seba’ punti mingħajr risposta bi three pointer ta’ Mercieca u baskets minn Anna Fenech Pace. Hibs reġgħu naqqsu d-distakk iżda basket minn Avila ħalla lil Luxol 11 minn fuq 51-40. Fl-aħħar sessjoni, Luxol bdew bit-three pointers minn Lisa Fenech Pace u Avila biex kabbru l-vantaġġ għal 18 -il punt 59-41. Hawn Hibs għamlu l-aħħar sforz bi break ta’ 16-3 bil-punti ta’ Jenkins u trippla ta’ Jasmine Abela biex waslu sa’ sitt punti ‘l bogħod 56-52. Avila reġgħat kienet determinanti b’ħames punti oħra fosthom trippla u minkejja li kien hemm ukoll three pointer għal Van Vliet, Luxol ħarġu rebbieħa 69-59. Il-Messikana ta’ Luxol Gladiana Avila b’persentaġġ finali ta’ 46%, 10 assists, 10 rebounds u 29 punt rebħet l-unur tal-MVP tal-finali hekk kif il-President tal-MBA Paul Sultana ppreżenta t-trofew lil captain ta’ Luxol Mandi Mercieca.
Caffè Moak Luxol: C. Sollami 4, M. Mercieca 11, L. Fenech Pace 3, H. Galea, G. Avila 29, K. Portelli, S. Fenech Pace, J. Diaby 14, S. Sciberras 2, S. Farrugia, M. Marmara, A. Fenech Pace 6.
Hibernians: K. Conti, I. Agius 9, A. Van Vliet 11, S. Brincat 9, J. Abela 3, K. Jenkins 18, K. Caruana 2, J. Gauci, 4, E. Cassar 7, J. Dabic, M. Mendez.
Referees: Zvezdan Dobrosaviljevic, Nicky Azzopardi, Fiorentina Ciurariu.
