Meta din il-Ġimgħa, il-Prim Ministru Robert Abela iltaqa’ ma’ Isabelle Bonnici, omm Jean Paul Sofia, li miet meta kkollassat binja fit-3 ta’ Diċembru li għadda “dehret ċara l-arroganza tiegħu fil-konfront ta’ din l-omm”.
Dan qalu d-Dekan fl-Università ta’ Malta, Andrew Azzopardi meta fuq il-media soċjali stqarr li qatt ma ra arroganza u mġieba ħażina daqsekk ċara fil-politiċi Maltin.
Huwa insista illi hu inaċċettabli li l-Prim Ministru prova jwaqqa’ l-argument ta’ omm f’luttu għal binha meta interrompiha u saħansitra meriha b’diskors legalistiku.
Azzopardi kompla jinsisti, li Abela prova jagħmilha tal-eroj, meta stqarr li qed jagħmel pressjoni fuq il-Ġudikanti. Filwaqt li infexx f’attakk politiku billi qal lill-omm li l-Partit Nazzjonalista u d-deputati, qed jinqdew biha politikament.
Id-Dekan tas-Social Wellbeing għalaq billi ddeskriva lil Isabelle Bonnici bħala ispirazzjoni, għaliex għalkemm f’luttu għal-binha, hi lesta tieqaf quddiem il-mexxeja tal-pajjiż, mexxeja fil-poter.
Il-Prim Ministru Robert Abela għadu qed iwebbes rasu u jinsisti li ma jiftaħx inkjesta pubblika dwar il-mewt traġika ta’ Jean Paul Sofia.
