Ċittadin Eġizzjan, li diġà kien qiegħed fuq pleġġ għal reati sesswali, ammetta wara li ġie mixli b’rabta ma’ attakk sesswali rrappurtat minn mara Taljana (ritratt). Najah Agheez, kaħħal ta’ 34 sena, li m’għandux post fiss ta’ residenza, ġie arrestat il-Ħamis li għadda wara li l-investigaturi identifikawh minn filmati tas-CCTV miġbuda fi stabbiliment f’Buġibba.
L-Ispettur Ryan Vella, li qed imexxi l-prosekuzzjoni flimkien mal-avukati Cythia Tomasuolo u Joseph Azarov, mill-uffiċċju tal-Avukat Ġenerali akkuża lil Agheez li wettaq att sesswali mhux kunsenswali fuq il-mara, li ta fastidju, li ssuġġettaha għal att mhux mixtieq ta’ intimità fiżika, li żammha kontra r-rieda tagħha u li kkawżaha biża’ li se tintuża l-vjolenza kontriha.
Huwa kien mixli wkoll li serilha l-mowbajl, li kkawża disturb pubbliku matul il-lejl u li kien fis-sakra f’post pubbliku. Agheez kien akkużat ukoll li kiser il-kundizzjonijiet tal-libertà proviżorja imposti fuqu f’Marzu ta’ din is-sena, b’rabta ma’ każ separat fejn jinsab akkużat li ta fastidju sesswali fuq tfajla ta’ 17-il sena fi Frar tal-2022.
Huwa tresaq quddiem il-Maġistrat Abigail Critien il-Ġimgħa wara nofsinhar, bir-raġel jammetti l-akkużi. Waqt li tressaq il-Qorti ma ħarġu l-ebda dettalji taċ-ċirkostanzi li wasslu għall-arrest tar-raġel. L-avukat tiegħu, Carmel Gatt, talab piena qrib il-minimu “minħabba ċ-ċirkostanzi.”
L-avukati tal-prosekuzzjoni mbagħad talbu permess biex jersqu lejn is-sedja tal-Maġistrat sabiex jiddiskutu l-piena. Mistoqsi mill-ġdid x’se jkun qed iwieġeb, l-imputat ikkonferma l-ħtija tiegħu. Fis-sottomissjonijiet tal-Prosekuzzjoni dwar il-piena, l-Avukat Tomasuolo talab sentenza ta’ kustodja fil-minimu tagħha, dan fid-dawl tan-natura tal-akkużi u l-fatt li kien għaddej proċeduri għal reat simili.
Fis-sottomissjonijiet tiegħu dwar il-piena, l-avukat difensur tal-ħati qal li l-imputat kien ħareġ jixrob dakinhar, peress li kien l-anniversarju tal-mewt ta’ ommu. “Hu ma jafx eżattament x’għamel.” Hu talab lill-Qorti tordna li Agheez jirċievi kura għall-vizzju tal-alkoħol.
Il-każ ġie differit għas-sentenza għall-4 ta’ Mejju. Ma saret l-ebda talba għall-ħelsien mill-arrest. Rapporti fil-midja indikaw li l-vittma, Lara Ali Shahin, għalliema u kunsilliera lokali mir-reġjun tal-Veneto tal-Italja, li qalet li l-aggressur tagħha kien segwiha fil-lukanda nhar il-Ħadd, wara li kienet irrifjutat l-avvanzi tiegħu aktar kmieni dakinhar.
Qalet li min attakkaha kien segwiha fil-kamra tagħha, fejn allegatament tefagħha fuq is-sodda u aggrediha sesswalment. L-istaff tal-lukanda, semgħu l-għajjat tagħha, marru fil-kamra u kaxkru lir-raġel il-barra minn fejn kienet Shahin. Agheez kien imbagħad ħarab minn fuq il-post.
