Colin Schembri
Mellieħa Libertas Spalding 90
Starlites FIJO 104
(24-31)(24-31)(23-27)(19-15)
Il-finali tal-kampjonat nazzjonali Bank of Valletta tal-irġiel fetħet bl-ewwel partita fuq l-aħjar minn ħamsa bejn Starlites Fijo u Mellieħa Libertas bit-team ta’ Paul Ferante jieħdu l-ewwel rebħa tas-serje finali. Għal ħin twil il-partita kienet bilanċjata għalkemm kien hemm waqtiet fejn Starlites fetħu vantaġġ tajjeb però kien hemm mumenti fejn Mellieħa ppruvaw jirkupraw. L-ewwel vantaġġ tal-partita kien fil-fatt ta’ Starlites li bil-punti fost l-oħrajn minn Matthew Scerri u Zekiah Owens marru 11-6 minn fuq. Mellieħa wieġbu bi break ta’ 9-2 biex marru fuq quddiem 15-13 għalkemm din kellha tkun l-unika darba li l-players ta’ Christian Narcisio kienu minn fuq. Ir-risposta ta’ Starlites ġiet minn Darius George flimkien ma’ Matthew Attard u Ian Felice Pace f’run ta’ 9-0. Mellieħa kellhom il-punti minn David Bugeja u Robert Bonnici però Starliteskomplew bi break ieħor ta’ 9-2 u minkejja trippla ta’Bonnici, huma temmew l-ewwel sessjoni 31-24 minn fuq. Matul it-tieni taqsima, l-vantaġġ ta’ Starlites kiber saħansitra għal 20 punti hekk kif kien hemm aktar punti minn Owens flimkien mat-trippli minn Attard u George flimkien ma’ Alec Felice Pace. Mellieħa wkoll kellhom it-trippli minn Bonnici kif ukoll il-punti ta’Sebastien Valencia u Nenad Bukva però Starlitesdaħlu jistrieħu 14 -il punt minn fuq 62-48.
It-tielet taqsima fetħet b’sitt punti konsekuttivi minn Mellieħa li però malajr ġew newtralizzati minn Starlitesbi break qawwi ta’ 15-2 bil-punt ta’ Owens u Jacob Bates flimkien mat-three pointers ta’ A. Felice Pace uScerri biex fetħu vantaġġ massimu ta’ 21 punt 77-56.Wara risposta oħra minn Mellieħa bi break ta’ 11-2, Starlites kellhom żewġ three pointers oħra minn Attard biex temmew is-sessjoni 89-71 minn fuq. Fl-aħħar perjodu, Mellieħa tħabtu biex jerġgħu jidħlu fil-partita però sabu lil Starlites jirrispondu għal kull sforz tagħhom fosthom bi tlett trippli oħra minn Attard u Scerri li rawhom jaqbżu l-mitt punt. Mellieħa għamlu l-aħħar ħames punti tal-partita però Starlites kellhom vantaġġ tajjeb biex ħadu l-ewwel rebħa tal-finali bl-iskor ta’ 104-90.
Mellieħa Libertas: S. Zammit, M. Falzon 1, D. Bugeja 9, R. Bonnici 16, V. Jandric 3, I. Bonett 10, N. Bukva 20, N. Jovanovic, M. Formosa, O. Said, S. Valencia 31.
Starlites FIJO: A. Felice Pace 13, Z. Owens 23, M. Attard 22, J. Bates 7, I. Felice Pace 2, M. Fabri, L. Riolo, M. Scerri 12, R. Carabott, K. Xuereb 1, N. Sultana, D. George 24.
Referees: Daniella Torok, Fiorentina Ciurariu, Zvezdan Dobrosaviljevic.
