Colin Schembri
Caffè Moak Luxol 58
Starlites FIJO 60
(19-14)(14-19)(12-14)(13-13)
L-ewwel finali mil-kampjonat Mapfre MSV Life tan-nisa bejn Caffè Moak Luxol u Starlites FIJO marret favur it-team ta’ Charles Bonnici hekk kif huma ħarġu rebbieħa 60-58. Kif mistenni l-partita kienet missielta u b’deċiżjonijiet jaħarqu mill-uffiċjali tal-partita fosthom żewġ fouls tekniċi msaffra lil Bonnici li kellhu jħalli l-court u foul tekniku fuq il-captain ta’ Luxol Mandi Mercieca li kien ukoll il-ħames wieħed tagħha fil-partita kmieni fit-tielet sessjoni. Luxol kellhom l-aħjar bidu tal-partita fejn marru 12 -il punt minn fuq. Huma kellhom żewġ three pointers minn Lisa Fenech Pace u Gladiana Avila flimkien ma’ Josephine Diaby u Anna Fenech Pace għal skor ta’ 16-4. Starlites naqqsu d-distakk bill-punti ta’ Amelia Simmons bil-Luxol ikollhom 4 punti oħra minn Avila biex temmew it-taqsima 19-14 minn fuq. Fit-tieni perjodu, kien hemm trippla fuq kull naħa u Luxol komplew b’punti konsekuttivi minn Diaby biex żammew vantaġġ ta’disa’ punti 31-22. Dan il-vantaġġ sfaxxa fix-xejn wara tlett trippli konsekuttivi ta’ Steffi De Martino u basket ta’ Michela Zammit Cordina li poġġijhom għall-ewwel darba minn fuq. Luxol għamlu l-aħħar basket tat-taqsima minn Diaby għal parita fi tmiem is-sessjoni 33-33.
Fit-tielet taqsima ż-żewġ timijiet bdew jirrispondu lil xulxin fl-istess waqt li kien hemm it-tkeċċijiet ta’Bonnici u Mercieca. Wara li Luxol reġgħu ħadu vantaġġ ta’ 4 punti, Starlies irkupraw permezz ta’Mikela Riolo u Simmons . Avila kompliet bil-punti għal Luxol iżda żewġ trippli ta’ Riolo rat lil Starlites itemmu t-taqsima basket minn fuq 47-45. L-aħħar taqsima kompliet tkun aktar missielta fejn il-vantaġġ beda jdur minn naħa għall-oħra. Starlites marru minn fuq bitrippla oħra ta’ De Martino qabel ma Luxol marru minn fuq bil-punti ta’ Sarah Fenech Pace. Starlites ħadu l-vantaġġ wara punti ta’ Simmons u Christina Curmi però trippla ta’ Lisa Fenech Pace poġġiet lil Luxol minn fuq fil-bidu tal-aħħar minuta. Fl-attakk ta’ wara kienet De Martino li għamlet is-sitt trippla tagħha. Luxol ma rnexxielhomx jerġgħu jirrispondu fis-sekondi li kien għad fadal biex Starlites ħarġu rebbieħa 60-58.
Caffè Moak Luxol: C. Sollami, M. Mercieca, L. Fenech Pace 6, H. Galea, G. Avila 25, K. Portelli, S. Fenech Pace 6, J. Diaby 17, S. Sciberras, S. Farrugia, M. Marmara, A. Fenech Pace 2.
Starlites FIJO: M. Zammit Cordina 2, M. Riolo 12, A. Saliba, M. Sciberras, M. Bonett 4, S. De Martino 22, M. Fenech, A. Simmons 10, C. Cilia, K. Mifsud, S. Davies, C. Curmi 10.
Referees: Zvezdan Dobrosaviljevic, Nicky Azzopardi, Bogdan Mrkojevic.
