Colin Schembri
Starlites FIJO……………….59
Caffè Moak Luxol………..69
(15-12)(16-16)(13-24)(15-17)
Caffè Moak Luxol ippareġjaw is-serje wara li fit-tieni partita tal-finali tal-Kampjonat Mapfre MSV Life għelbu lil Starlites FIJO 69-59. Partita li ħadet svolta mportanti kmieni fl-aħħar taqsima hekk kif Starlites tilfu lil captain Steffi De Martino bil-ħames foul. Kienu Luxol li ħadu l-ewwel vantaġġ minkejja li kien hemm trippla ta’ Mikela Riolo għal Starlites. Starlites komplew bi break ta 8-2 b’diversi punti minn Amelia Simmons flimkien ma’ Riolo biex temmew it-taqsima 3 punti minn fuq 15-12. Il-players ta’ Charles Bonnici komplew jagħfsu fil-ftuħ tat-tieni perjodu b’sitt punti mingħajr risposta minn Simmons u De Martino. Għal Luxol kien hemm risposta minn Josephine Diaby u Gladiana Avila però Simmons flimkien ma’ Christina Curmi ħallew lil Starlites b’vantaġġ ta’ 4 punti 25-21. L-aħħar ħinijiet tal-perjodu kienu maqsuma bejn iż-żewġ timijiet hekk kif l-ewwel kienu Starlites li għamlu sitt punti mingħajr risposta però Luxol ukoll irrispondew bi break ta’ 7-0 bill-punti ta’ Avila u Lisa Fenech Pace għal skor ta’ 31-28.
Fit-tielet sessjoni Luxol ħarġu tajjeb u bdew bi break ta’ 7-2 maqsum bejn Diaby u Mandi Mercieca biex marru fuq quddiem 39-36. Wara risposta minn Maria Bonett u Simmons għal Starlites, Luxol komplew bi break ieħor ta’ 10-0 bil-punti ta’ Avila, Fenech Pace u Diaby. Starlites kellhom risposta oħra minn Simmons qabel ma trippla ta’ Fenech Pace għalqet is-sessjoni favur Luxol 52-44. Fl-aħħar perjodu Starlites kellhom żewġ trippli oħra minn Riolo u Simmons però hawn tilfu lil De Martino bil-ħames foul. Luxol għamlu break qasir ta’ 7-2 bil-punti ta’ Avila, Diaby u L. Fenech Pace. Riolo għamlet ħames punti oħra għal Starlites però ftit kien għad fadlilhom ħin u Luxol serrħu rashom mir-riżultat bl-aħħar punti ta’ Avila u Mercieca hekk kif ħarġu rebbieħa 69-59.
Starlites FIJO: M. Zammit Cordina 6, M. Riolo 11, A. Saliba, M. Sciberras, M. Bonett 6, S. De Martino 7, M. Fenech, A. Simmons 25, C. Cilia, K. Mifsud, S. Davies, C. Curmi 4.
Caffè Moak Luxol: C. Sollami, M. Mercieca 6, L. Fenech Pace 7, H. Galea, G. Avila 31, K. Portelli, S. Fenech Pace 8, J. Diaby 15, S. Sciberras 2, S. Farrugia, M. Marmara, A. Fenech Pace.
Referees: Zvezdan Dobrosaviljevic, Ivica Simic, Fiorentina Ciurariu
