Colin Schembri
Caffè Moak Luxol………..52
Starlites FIJO………………..57
(6-13)(20-14)(15-11)(11-19)
Starlites FIJO kisbu t-tieni rebħa fil-finali tal-kampjonat Mapfre MSV Life tan-nisa u issa jinsabu fil-vantaġġ fis-serje finali u rebħa ‘l bogħod mir-rebħ tal-kampjonat.Il-partita kellha bidu kwiet ferm fejn wara l-ewwel erba’ minuti kien sar biss basket wieħed minn Starlites li komplew b’run ta’ 7-0 bil-punti ta’ Steffi De Martino, Amelia Simmons u Maria Bonett. Kellhom jagħddu kważi sitt minuti u nofs biex wasal l-ewwel basket ta’ Luxol minn Gladiana Avila però aktar punti minn De Martino u Simmons raw lil Starlites itemmu l-ewwel taqsima 13-6 minn fuq. Fit-tieni perjodu kien hemm risposta minn Luxol fejn wara li sofrew trippla ta’ Simmons huma naqqsu d-distakk bil-punti ta’ Josephine Diaby u Avila. Għal xi ħin iż-żewġ timijiet irrispondew lil xulxin biex Starlites żammew il-vantaġġ u saħansitra kabbruh għal 10 punti wara baskets minn Simmons u Bonett 26-16. Hawn però Luxol kellhom mument tajjeb meta għamlu break ta’ 10-1 bil-punti ta’ Avila, Diaby u l-aħwa Sarah u Anna Fenech Pace biex naqqsu d-distakk għal punt 26-27.
Wara l-intervall Luxol komplew fejn ħallew u rnexxielhom jieħdu l-vantaġġ għall-ewwel darba wara punti ta’ Lisa Fenech Pace u Avila. Ir-risposta ta’ Starlites ġiet bi break qasir ta’ 8-3 bil-punti ta’ Mikela Riolo u Michela Zammit Cordina bex għamlu l-iskor indaqs 36-36. A. Fenech Pace u Diaby reġgħu poġġew lil Luxol fuq quddiem u huma żammew il-vantaġġ sa’ tmiem il-perjodu 41-38. Fl-aħħar taqsima, Luxol fetħu b’basket minn Avila però Starlites wieġbu permezz ta’ De Martino u Zammit Cordina. Luxol bdew ibatu biex jinfdu d-difiża ta’ Starlites li minn naħa tagħhom bdew isibu l-basket b’aktar frekwenza speċjalment permezz ta’ De Martino li għamlet l-aħħar punti tagħhom u Starlites irnexxielhom jieħdu r-rebħa fuq skor ta’ 57-52 u rebħa fir-raba’ partita tatijhom il-kampjonat. Minn naħa tagħhom Luxol ma jistgħux ifallu jekk iridu jżommu t-titlu li rebħu l-istaġun li għadda.
Caffè Moak Luxol: C. Sollami, M. Mercieca 4, L. Fenech Pace 11, H. Galea, G. Avila 17, K. Portelli, S. Fenech Pace 4, J. Diaby 12, S. Sciberras, S. Farrugia, M. Marmara, A. Fenech Pace 4.
Starlites FIJO: M. Zammit Cordina 6, M. Riolo 4, A. Saliba, M. Sciberras, M. Bonett 11, S. De Martino 25, M. Fenech, A. Simmons 11, C. Cilia, K. Mifsud, S. Davies, C. Curmi.
Referees: Daniella Torok, Zvezdan Dobrosaviljevic, Nicky Azzopardi.
