Colin Schembri
Hibernians…………66
Starlites Blue……..55
(20-17)(14-17)(22-3)(10-18)
Fl-ewwel finali mill-kampjonat tal-irġiel taħt id-dsatax –il sena, Hibernians għelbu lil Starlites Blue 66-55 biex b’hekk ħadu l-ewwel rebħa fis-serje finali. Riżultat li fisser l-ewwel telfa ta’ Starlites fil-kampjonat li waslu f’dan l-istadju mingħajr telfa fosthom rebħ kontra l-istess avversarji 63-57 u 78-72. Biex waslu fil-finali, Hibernians għelbu lil Luxol 69-62 fil-waqt li Starlites għelbu lil Gżira Athleta 98-42. Il-partita kienet bilanċjata fl-ewwel żewġ sessjonijiet però fit-tielet taqsima Hibs kienu dominanti u ħallew lil Starlites fuq tlett punti biss. Kienu Starlites li ħadu l-ewwel vantaġġ ta’ 8-4 wara l-ewwel minuti bil-punti ta’ Sean Aquilina u Louie Farrugia. Hibs wieġbu bi break ta’ 9-0 fosthom trippli minn Neil Cassar u Luca Borg. Wara li Farrugia waqqfilhom ir-run, Gabriel Cassar u Borg kellhom aktar punti għall-Pawlisti. Starlites reġgħu ġew lura b’sitt punti minghajr risposta biex l-ewwel taqsima għalqet bil-Hibs 3 minn fuq 20-17. Fit-tieni taqsima, Starlites marru minn fuq wara punti minn JJ Dimech 23-20. Il-vantaġġ kompla jdur minn naħa għall-oħra b’Borg jagħmel żewġ trippli oħra bi Starlites ukoll ikollhom trippla minn Sebastien Pace biex fl-intervall kellna parita 34-34.
Fit-tielet sessjoni, Starlites intfew kompletament mill-partita għaliex wara li bdew bi free-throw ta’ Farrugia, sofrew run qawwija ta’ 21-0 li rat fost l-oħrajn trippla ta’ Luke Attard u diversi punti minn N. Cassar, G. Cassar u Borg. Kien biss lejn it-tmiem li Starlites għamlu l-uniku basket tagħhom permezz ta’ Adam Azzopardi għal skor ta’ 56-37. Fl-aħħar taqsima, Hibs reġgħu kabbru l-vantaġġ wara trippla oħra minn Attard u basket ta’ Borg. Hawn Starlites ippruvaw jirkupraw meta għamlu run ta’ 13-2 b’żewġ trippli ta’ Pace. Dan wassalhom sa’ 13 -il punt ‘l bogħod 50-63 però kien għad fadal biss anqas minn żewġ minuti biex Hibs ħarġu rebbieħa 66-55. It-tieni finali tintlagħab Il-Ġimgħa 5 ta’ Mejju fit-tmienja ta’ fl-għaxija.
Hibernians: Neil Cassar 15, Zaine Fenech, Shaun Borg, Matthew Bezzina, Luca Borg 22, Luke Attard 11, Quang Vinh Nguyen, Vido Kustidija 1, Gabriel Cassar 17.
Starlites Blue: Sean Aquilina 8, Sebastien Pace 11, Kai Fabri 2, Adam Azzopardi 3, Isaac Azzopardi 3, Marco Farrugia, Kyle Deguara, Louie Farrugia 16, JJ Dimech 4, Aleksander Sultana 5, Aiden Sammut 3.
Referees: Bernard Vassallo, Gordon Barbara, Nicky Azzopardi.
