Aktar ma jmur aktar qed ikun hemm diżgwid u taħwid fit-titjriet tal-linja nazzjonali AirMalta. Kważi kuljum qed nisimgħu b’dewmien u titjiriet ikkanċellati.
Bl-aktar waħda riċenti tkun it-titjira KM 376 għal Berlin li telqet minn Malta fis-2:11pm tal-Ħadd, b’161 persuna abbord. Għall-ħabta tal-3:40pm l-ajruplan kellu jagħmel inżul fl-Ajruport Internazzjonali Federico Fellini, Rimini, l-Italja minħabba problemi f’waħda mill-magni.
Passiġġieri li kienu fuq din it-titjira u tkellmu ma’ Net News qalulna li dan qajjem frustrazzjoni kbira hekk kif huma tħallew jiġbru l-bagalji tagħhom ftit qabel id-9:30pm. Kien dak il-ħin li huma ġew avżati u ftit tal-ħin wara ġew trasferiti għal akkomodazzjoni fil-qrib fejn setgħu iqattgħu il-lejl.
Kawża ta’ din id-devjazzjoni, it-titjira KM 377 minn Berlin għal Malta se tkun ukoll skedata mill-ġdid b’dewmien sostanzjali.
Intant, it-tħarbit fl-iskeda tal-AirMalta bħal donnu sar xi ħaġa regolari speċjalment minn meta ftit tal-ġimgħat ilu kellna l-konferma li l-linja nazzjonali tal-ajru se tagħlaq il-bibien tagħha sal-aħħar tas-sena.
