Qorti fi New York sabet lill-eks President Amerikan Donald Trump ħati ta’ abbuż sesswali u malafama fil-konfront tal-awtriċi u ġurnalista E Jean Carroll.
Il-każ – li jmur lura għas-snin disgħin – kien seħħ fl-istabbiliment tal-ħwienet ta’ Bergdorf Goodman f’Manhattan, madankollu, il-Qorti deċidiet li Trump ma stuprax lill-awtriċi skont l-akkuża oriġinali.
Fl-istess ħin, il-qorti qalet Donald Trump jista’ jkollu jwieġeb għall-malafama talli rrefera għall-akkużi ta’ Carroll bħala ‘gideb ibbażat fuq storja vvintata’.
Din hi l-ewwel darba li eks President Amerikan instab ħati ta’ abbuż sesswali – bi Trump ikun ordnat biex iħallas kważi $5 miljuni lill-awtriċi bħala kumpens relatat mal-akkużi kontra Trump li kienu validati mill-qorti.
Il-ġuri magħmul minn sitt irġiel u tlett nisa laħaq din id-deċiżjoni wara anqas minn tliet sigħat ta’ deliberazzjonijiet – bl-avukat ta’ Trump jgħid li l-eks President qed jaħseb biex jappella mill-verdett finali.
