Ir-Regolament tal-UE li jistabbilixxi l-Fond Soċjali għall-Klima, ta’ Casa, ġie formalment konkluż, hekk kif l-ogħla rappreżentanti tal-UE appoġġjaw il-Fond il-ġdid bil-firma tagħhom.
Fi Strasburgu saret ċeremonja tal-iffirmar li għaliha kien preżenti l-MPE David Casa bħala negozjatur ewlieni fuq il-Fond Soċjali għall-Klima. It-test finali ġie ffirmat mill-President tal-Parlament Ewropew Roberta Metsola u mill-Ministru għall-Affarijiet Barranin Svediża Jessika Roswall, bħala rappreżentant tal-Presidenza tal-Kunsill tal-Unjoni Ewropea.
Ladarba ġie ffirmat, ir-regolament se jiġi ppublikat fil-Ġurnal Uffiċjali tal-Unjoni Ewropea, u b’hekk jintemm proċess li inkludi kważi 18-il xahar ta’ negozjati.
“Il-Fond Soċjali għall-Klima, li permezz tiegħu l-Maltin se jibbenefikaw minn mobilizzazzjoni ta’ €60 miljun, se jibda jopera fl-2026,” spjega Casa. “Jirrappreżenta investiment totali ta’ sa €86.7 biljun madwar l-Unjoni Ewropea għall-benefiċċju tal-familji u l-iżgħar intrapriżi.
“L-investimenti fl-effiċjenza tal-enerġija se twassal għal inqas emissjonijiet, u għal aktar frankar fuq il-kontijiet fit-tul għaċ-ċittadini. Bħala r-ruħ soċjali tal-pakkett fit-for-55, il-Fond Soċjali għall-Klima huwa l-aktar pass soċjali importanti fit-transizzjoni klimatika.
