Membru tal-ekwipaġġ li żvojta safe minn fuq ta’ vapur b’aktar minn €100,000 fi flus kontanti ngħata sentenza sospiża u pprojbit milli jidħol fil-pajjiżi kollha ta’ Schengen għal ħames snin. Is-serqa seħħet fil-lejl bejn id-9 u l-10 ta’ Mejju meta mazez ta’ flus kontanti f’ewro u dollari Amerikani spiċċaw nieqsa mis-safe abbord il-bastiment li kien irmiġġat fit-tarzna ta’ Bormla.
L-investigazzjonijiet wasslu għall-arrest ta’ Adesh Sahye, maniġer ta’ restorant ta’ 33 sena mill-Mauritius li l-Ġimgħa ġie skortat il-qorti, biex jiffaċċja prosekuzzjoni għas-serq li kien aggravat bil-mezzi, l-ammont, il-persuna, il-post u l-ħin. Is-somma misruqa għad-detriment ta’ sħabu l-ekwipaġġ kienet tammonta għal €103,739.15.
Il-preżentata bdiet fuq sieq falza wara li d-difiża qajmet kwistjoni ġurisdizzjonali fid-dawl tal-fatt li l-bastiment tajjar bandiera Franċiża u d-dispożizzjoni relattiva tal-liġi taħt il-Kodiċi Kriminali ħalliet lok għal dubju. Madankollu, il-kwistjoni ġiet riżolta wara li ntalab parir mill-uffiċċju tal-Avukat Ġenerali.
L-Ispettur Gabriel Kitcher spjega li peress li l-bastiment kien ġewwa l-ibħra territorjali Maltin, il-qrati Maltin kellhom ġurisdizzjoni irrispettivament mill-bandiera tal-bastiment. Il-kwistjoni kienet tkun differenti kieku l-bastiment kien bastiment militari.
Wara li kkonsulta lill-avukat tal-għajnuna legali, Josette Sultana, l-akkużat irreġistra ammissjoni li kkonferma wara li ngħata żmien biżżejjed biex jerġa’ jikkunsidra għemilu. Il-prosekuzzjoni rrimarkat li l-flus kienu rritornati. L-akkużat kien naddaf is-safe u bbukkja titjira barra minn Malta, ngħad lill-Qorti.
Meta għamlet sottomissjonijiet dwar il-piena, id-difiża saħqet fuq il-fatt li l-fondi kollha ġew irkuprati u l-akkużat kien ikkollabora l-ħin kollu. Il-prosekutur enfasizza l-ammont misruq u l-fatt li s-serqa kienet tinvolvi sgass, talbet lill-qorti biex tipprojbixxi lill-akkużat milli jirritorna Malta jew xi pajjiż ieħor fl-Ewropa.
Wara li semgħet is-sottomissjonijiet il-Qorti, ippreseduta mill-Maġistrat Claire Stafrace Zammit, iddikjarat lir-raġel ħati mal-ammissjoni u fid-dawl tal-fatt li l-flus kollha ġew irkuprati, ikkundannatu għal sentejn ħabs sospiżi għal erba’ snin. Il-Qorti pprojbit ukoll lill-akkużat milli jivvjaġġa lejn kwalunkwe territorju Schengen matul il-ħames snin li ġejjin.
