Mara akkużata li għenet lill-imgħallem tagħha jaħsel il-flus u li allegatament iffroda diversi persunu fuq taxxa b’miljuni ta’ ewro ingħatat il-libertà proviżorja. Henrietta Cassar, skrivan li kienet taħdem għall-kuntrattur Martin Farrugia, ingħatat il-ħelsien mill-arrest it-Tlieta wara digriet tal-Maġistrat Leonard Caruana.
Il-prosekuturi qed jallegaw li Cassar ħarġet fatturi frawdolenti, sarrfet ċekkijiet fuq talba ta’ Farrugia, u li naqas milli jiddikjara d-dħul lill-awtoritajiet tat-taxxa, f’dak li l-prosekuzzjoni qed tallega li huwa ħasil ta’ flus u frodi li jlaħħaq it- €62 miljun.
Waqt l-arrest tagħha x-xahar li għadda, il-prosekuturi qalu lill-Qorti li hija kienet iddepożitat madwar €960,000 f’ċekkijiet marbuta mal-attivitajiet kummerċjali ta’ Farrugia iżda ma kienet iddikjarat l-ebda dħul mal-Kummissarju tat-Taxxi Interni.
Hi għamlet ukoll madwar €150,000 fi profitti min-negozju separat tagħha relatat ma’ memorabilia. Inizjalment Cassar ma kinitx ingħatat il-libertà proviżorja wara oġġezzjonijiet mill-prosekuzzjoni. Iżda fis-seduta ta’ nhar it-Tnejn, il-prosekuturi waqgħu dawk l-oġġezzjonijiet, u qalu li l-akkużata ikkomunikat mal-ispettur inkarigat mill-każ.
Il-maġistrat għażel li jiddelibera fuq it-talba għall-ħelsien mill-arrest, u nhar it-Tlieta ddeċida favur li jilqa’ t-talba. Cassar ingħatat il-pleġġ fuq depożitu ta’ €10,000 u garanzija personali ta’ €50,000, tiffirma fl-Għassa tal-Pulizija tliet darbiet fil-ġimgħa u tibqa’ d-dar bejn id-9pm u s-6.30am kuljum. Cassar qed tkun rappreżentata mill-avukati Franco Debono u Francesca Zarb.
