Mara ddeskriviet kif Jeremie Camilleri ta daqqa fuq rasha b’ġebla u ddikjara magħha li hu kien “ir-re tal-Gżira” wara li tajjar u qatel lil Pelin Kaya. Fiona Brincat xehdet fil-kumpilazzjoni fil-konfront ta’ Camilleri, li jinsab mixli li qatel lill-mara Torka meta meta saq l-karozza tiegħu għal ġo fiha waqt li kienet taħt l-effett kokaina.
Hi qalet lill-Qorti li kienet spiċċat mingħajr sigaretti u qabdet taxi lejn il-Gżira biex tixtri provvista ġdida, għax hemm kienet taf li jkunu għadhom miftuħin. Qalet iżda li bilkemm kienet ħarġet mill-vettura u resqet lejn ħanut meta ħasset lil xi ħadd miexi lejha.
Dak il-ħin kienet għadha kif lemħet mara, li aktar tard kienet identifikata bħala l-vittma, mimduda fit-triq u kienet qed tgħid lis-sieħba tagħha, Jaħasra, miskina,” meta dan ir-raġel li ma kinitx taf resaq lejha, neħħa l-flokk minn fuqu u f’daqqa waħda ta daqqa f’rasha b’ġebla mdaqqsa.
“Għaliex?” kienet l-unika kelma li Brincat qalet, meta kienet kompletament maħsuda. Iżda hu wieġeb li kien, “ir-re tal-Gżira” u mexa lura lejn il-BMW imfarrka mal-faċċata tal-ħġieġ tal-ħanut tal-KFC fuq in-naħa l-oħra tat-triq. Hekk kif ħasset demm kiesaħ nieżel minn fuq wiċċha, ħarbet biex tfittex is-sigurtà.
“Ħrabt. Ma kienx hemm ambulanzi fuq il-post. U rasi ħaddejtha imfarrka. Seta’ joqtolni,” qalet ix-xhud u żiedet li t-tabib li kien ikkuraha fil-klinika tas-saħħa kien poġġa dak li qed tgħid fuq iċ-ċertifikat mediku. Mistoqsija mill-qorti jekk tistax tidentifika l-aggressur tagħha, ix-xhud wieġbet, “100%,” daret u ppuntat direttament lejn l-akkużat li kien bilqiegħda fl-iżbarra ħdejn l-interpretu tiegħu.
Ix-xhud qalet li Camilleri laqatha darba biss. Hija ftakret kif fil-ħin tal-inċident, ħafna nies kienu qed jgħajtu lill-aggressur, jgħidulu “x’qed tagħmel? Miġnun!” u jieħu videos u ritratti tar-raġel. Uffiċjal tal-Pulizija mill-għassa ta’ Tas-Sliema xehed dwar is-sejħa li ħarġet għall-ħabta tas-1.10am fil-lejl ta’ Jannar, fejn xi ħadd irrapporta li mara kienet ittajjret fi Triq Testaferrata, il-Gżira.
“Biex ngħid il-verità, id-dehra tal-vittma kif kienet ma’ l-art baqgħet f’moħħi għal diversi jiem,” qal is-surġent Sandro Mangion li ddeskriva x-xena tal-inċident li malajr induna li ma kienx inċident tat-traffiku ordinarju iżda x’aktarx każ ta’ qtil.
Speċjalista fl-emerġenza kien qal lix-xhieda li l-vittma ftit li xejn kellha ċans li tgħix. Mangion imbagħad fakkar li sema’ l-għajjat. Kien Camilleri, immanettjat u jargumenta mal-uffiċjali tal-RIU li kellhom jużaw it-taser u kienu qed jippruvaw jikkalmawh.
Terza persuna qal lis-surġent li s-sewwieq tal-BMW kien tefa’ ġebel lejn il-karozza tiegħu, lejn in-nies u wkoll lejn il-katavru tal-mara mimduda mal-art. Kulħadd fuq il-post beża’ u kollha qalu li l-akkużat kien ħareġ mill-karozza tiegħu u tefa’ ġebel lejhom u lejn il-vittma.
Is-Surġent fakkar ukoll kif jumejn wara l-inċident, mara kienet daħlet fl-għassa li tirrapporta kif Camilleri kien taha daqqa ta’ ġebla f’rasha meta niżlet il-Gżira biex tixtri s-sigaretti. Kellha wkoll il-ponti ma’ rasha, spjega Mangion li kien niżżel ir-rapport tagħha.
Residenti mill-Gżira li kien jgħix qrib is-sit tal-inċident qal li kien raqad matul l-episodju kollu u qam biss għall-aħbarijiet fuq il-midja soċjali l-għada filgħodu. Huwa ħareġ għall-karozza tiegħu qabel telaq lejn ix-xogħol għall-ħabta tat-8am, tenna David Buhagiar.
Il-lejl ta’ qabel kien ipparkjaha fiċ-central strip ħdejn il-pompa tal-petrol Paul and Rocco u kien hemm fejn sabha l-għada filgħodu, bil-ġenb tagħha bil-ħsara. Sa dak iż-żmien, il-biċċa l-kbira tad-debris ikkawżat mill-ħabta kien ġie mneħħi.
Kulma ra kien il-faċċata tal-ħġieġ miksur tal-ħanut tal-KFC. Il-Pulizija tah struzzjonijiet biex jikseb kwotazzjoni għad-danni iżda diversi panel beaters dehru riluttanti li jipprovdu valutazzjoni. Sid il-karozza kien finalment iddeċieda li jħallas għat-tiswijiet, u ħarġet €212.40 li għalihom ippreżenta irċevuta fil-qorti.
Tkompli l-każ ippresedut mill-Maġistrat Rachel Montebello. L-Ispettur Kurt Zahra qed imexxi l-prosekuzzjoni, assistit mill-avukat AG Kaylie Bonett u Nathaniel Falzon. L-avukati Alfred Abela u Rene Daramanin huma avukati difensuri. L-avukati Shazoo Ghaznavi, Charlon Gouder u Ramona Attard dehru parte civile. Il-kumpilazzjoni se tkompli nhar il-Ħamis, 25 ta’ Mejju fil-11am.
