Colin Schembri
Starlites Mazars…..21
Luxol……………………59
(4-13)(4-13)(9-17)(4-16)
Luxol rebħu l-kampjonat tat-tfajliet ta’ taħt is-sittax -il sena mill-ġdid taħt it-tmexxija ta’ Roderick Vella. Fil-fatt dan kien it-tieni kampjonat konsekuttiv mingħajr telfa għal Luxol f’din il-kategorija u din is-sena kienet evidenti s-superjorita tagħhom fuq timijiet oħra. Il-punti ta’ Starlites ġew mill-koppja Ylenia Ferrando u Lexi De Martino fil-waqt li l-punteġġ ta’ Luxol kien maqsum bejn aktar players. Wara basket fuq kull naħa minn Sarah Sciberras u Ylenia Ferrando, Luxol kellhom 11 -il punt mingħajr risposta fosthom żewġ baskets minn Sarah Fenech Pace flimkien ma’ Vanya Baldacchino, Jada Said u Shanice Farrugia biex temmew it-taqsima 13-4 minn fuq. Luxol fetħu t-tieni taqsima bi trippla ta’ Said u wara 3 punti oħra minn Starlites, l-andament tal-partita baqa’ l-istess bil-Luxol jagħlqu bi trippla oħra ta’ Said għal skor ta’ 26-8.
Wara l-intervall, Starlites sabu l-punti b’mod aktar frekwenti għalkemm Luxol baqgħu fil-kontroll tal-partita. Luxol kellhom il-punti konsekuttivi minn Sciberras flimkien ma’ trippla minn Baldacchino u baskets minn Ella Abela bit-taqsima tintemm 43-17 favur il-vjola. L-aħħar taqsima kienet biss formalita fejn wara li Luxol fetħu b’ħames punti mingħajr risposta, De Martino kellha żewġ baskets għal Starlites. Minn hemm ‘l quddiem kien hemm biss il-punti ta’ Luxol li bdew bit-tielet trippla ta’ Said flimkien ma’ Gwen Carabott u Abela biex Luxol ħarġu rebbieħa 59-21. Fit-tmiem il-partita s-Segretarju Ġenerali tal-MBA Joseph Muscat ppreżenta t-trofew ta’ Champions lil captain ta’ Luxol Sarah Sciberras fost il-ferħ tal-partitarji tagħhom.
Starlites Mazars: Ylenia Ferrando 9, Philippa Riolo, Giulia Cacciatore, Maya Chircop, Angelica Mangianello, Martina Costa, Andria Buckwell, Francesca Vella, Andria Buckwell, Maria Vella, Lexi De Martino 12.
Luxol: Gwen Carabott, Rebecca Fenech Pace 5, Sarah Sciberras 8, Jada Said 15, Ella Abela 12, Sarah Fenech Pace 7, Shanice Farrugia 7, Vanya Baldacchino 5, Chloe Schembri.
Referees: Zvezdan Dobrosaviljevic, Nicky Azzopardi, Ivica Simic.
