Grupp ta’ tlettax-il player żagħżugħ mill-Athleta Basketball Club għadhom kif irritornaw Malta wara l-parteċipazzjoni b’suċċess fit-12-il edizzjoni tat-Torneo Citta di Salsomaggiore. Athleta ħadu sehem fil-kategorija ta’ taħt it-tlettax -il sena flimkien ma’ disa’ timijiet oħra minn madwar l-Italja.
Il-Grupp kien immexxi mill-coaches Nathan Xuereb u Isaac Xuereb flimkien mat-Team Manager Miguel De Flavia. It-team tal-Athleta tpoġġa fi Grupp Orange flimkien ma’ erba’ timijiet oħra. Huma bdew din l-esperjenza b’rebħa fl-ewwel logħba tagħhom kontra Basket Salso. Għalkemm offrew oppożizzjoni iebsa fil-partiti li kien għad fadal, it-team Malti ma setax jikseb rebħa oħra fl-istadji preliminari.
Oleggio Basket kienu r-rebbieħa tal-Grupp Orange u spiċċaw runners up globali fejn tilfu kontra r-rebbieħa eventwali tat-Tournament, Bugs Malnate. Fit-Tieni fażi tat-tournament Athleta tilfu kontra Roma EUR biex jispiċċaw fit-8 post ġenerali. Minkejja dan, din kienet esperjenza unika għaż-żgħażagħ subien Maltin li kellhom l-opportunità li jipparteċipaw għall-ewwel darba f’tournament internazzjonali li barra minn Malta. Dan żgur se jservi għalijhom fl-isforzi futuri tagħhom bħala team kif ukoll individwalment għall-iżvilupp personali tagħhom.
Fi stqarrija l-Club qal li huma kburin li t-tim ta’ Athleta ta’ taħt it-tlettax -il sena kien mistieden
Biex jieħu sehem f’kampjonat prestiġjuż bħal dan. Il-Club jixtieq jirringrazzja wkoll lid-diversi sponsorsli għamlu din iż-żjara possibbli u b’mod partikolari lil Apcopay għall-appoġġ ġeneruż tagħhom. Apcopay li tifforma parti minn Hili Ventures toffri soluzzjoni ta’ pagamenti integrata bis-sħiħ.
