Fis-27 programm SPORT EXTRA li se jixxandar illum mill-5.15 pm ‘l quddiem fuq Net Television, ikompli s-serje b’rabta mal-edizzjoni MALTA2023 tal-Logħob tal-Pajjiżi ż-Żgħar tal-Ewropa li għandhom isiru bejn id-29 ta’ Mejju u 3 ta’ Ġunju.
Fl-ewwel parti tal-programm it-tema ewlenija hija l-isparar. Intervistat il-President tal-Malta Shooting Sports Federation Frans Pace kif ukoll wieħed mit-tiraturi ewlenin Clive Farrugia li se jieħu sehem fl-iskeet u fit-tielet esperjenza tiegħu fil-Logħob.
Fit-tieni parti enfażi dwar l-għawm flimkien mal-kowċ nazzjonali Delon Dannhauser u l-għawwiema Sasha Gatt u Dylan Cachiali t-tnejn huma fit-tieni esperjenza tagħhom f’dan il-Logħob. Gatt u Cachia se jieħdu sehem fl-400m, 800m u 1500m .
Muntaġġi tas-servizzi u assistenta tal-produzzjoni Samira Cachia Spiteri u filmati minn Joe Sultana.
