Sandra Gauci inħatret bħala Chairperson ta’ ADPD-The Green Party waqt il-laqgħa ġenerali annwali li saret is-Sibt filgħodu. Waqt din il-laqgħa ġie ukoll ikkonfermat il-Kumitat Eżekuttiv tal-partit.
Meta indirizzat konferenza stampa fi tmiem il-laqgħa, Gauci qalet li n-nies iridu drittijiet mhux ċekkijiet kif ukoll li jgħixu f’pajjiż fejn tirrenja s-saltna tad-dritt bis-serjetà, fejn il-mertu u mhux il-ħbieb tal-ħbieb ikunu l-kejl li fuqu bniedem jimxi ‘l quddiem, u fejn il-kwalità tal-ħajja tkun verament imħarsa.
Sandra Gauci ilha attiva fl-ADPD għal dawn l-aħħar tliet snin. Hija għandha Baċellerat fl-Edukazzjoni fit-Taljan u Masters fil-Letteratura Taljana, kif ukoll borża ta’ studju mill-Università ta’ Siena fuq it-tagħlim tat-Taljan permezz taċ-ċinematografija. Hija għalliema tat-Taljan fl-iskejjel pubbliċi b’21 sena esperjenza.
Hija se tikkontesta l-elezzjoni għall-Parlament Ewropew tas-sena d-dieħla f’isem ADPD – The Green Party flimkien ma’ Ralph Cassar u Mina Jack Tolu.
Waqt id-diskors tagħha hija rreferiet għall-mekkaniżmu tal-COLA li għandu bżonn jiġi aġġornat biex jirriffletti l-istil ta’ ħajja tal-familji tal-lum.
Il-membri tal-Kumitat Eżekuttiv huma dawn:
- Sandra Gauci – Chairperson
- Mina Jack Tolu – Deputat Chairperson
- Carmel Cacopardo – Deputat Chairperson
- Ralph Cassar – Segretarju Generali
- Mario Mallia– Deputat Segretarju Generali (Organizattiv u Amministrattiv)
- Melissa Bagley – Deputat Segretarju Generali (Policy)
- Brian Decelis – Uffiċjal għar-Relazzjonijiet Pubbliċi
- Luke Caruana – Teżorier
- Mark Zerafa – Segretarju Internazzjonali
- Marcus Lauri u Matthew Mizzi – Membri