Suldat inżamm arrestat wara li ġie mixli li weġġa’ gravi lill-ġar tiegħu f’alterkazzjoni dwar ilment dwar ħsejjes. Manuel Borg ta’ 37 sena minn Ħal Ħal Safi tressaq il-Qorti quddiem il-Maġistrat Kevan Azzopardi it-Tlieta wara nofsinhar, akkużat li kkaġuna feriti gravi fuq il-vittma, ħaddiem ta’ fabbrika Filippin, fil-preżenza ta’ minorenni, għall-ħabta tat-3pm tat-28 ta’ Mejju.
L-Ispetturi Kevin Pulis u Kurt Farrugia akkużaw ukoll lil Borg, suldat li jservi mal-AFM, li wettaq reat li kien fid-dmir li jipprevjeni. L-Ispettur Pulis qal lill-Qorti li l-imputat u l-vittma kienu joqogħdu fi flats fuq xulxin u li l-aggressjoni kienet seħħet fil-kuntest ta’ ilment dwar storbju qawwi.
Il-pulizija stabbiliet li l-imputat kien attakka lill-vittma, u li l-ġrieħi tal-vittma ġew iċċertifikati li kienu gravi. Wara li r-raġel aggredit qal lill-pulizija li l-aggressur tiegħu kien xi ħadd mill-blokk tiegħu, l-uffiċjali marru fir-residenza ta’ Borg. Borg kien ammetta li aggredixxa lill-vittma, qal l-ispettur.
L-avukat difensur Victor Bugeja informa lill-Qorti li l-imputat kien qed iwieġeb mhux ħati u talab il-ħelsien mill-arrest għall-klijent tiegħu, u ddeskriva l-inċident bħala każ ta’ ‘self defence’. Il-prosekuzzjoni oġġezzjonat għall-ħelsien mill-arrest, u indikat in-natura serja tal-akkużi, li jġorru sentenzi sostanzjali ta’ ħabs u r-riskju li l-akkużat ibagħbas l-evidenza.
L-Ispettur Pulis fakkar fil-Qorti li l-imputat u l-vittma kienu joqogħdu fl-istess blokk ta’ appartamenti. Iżda meta l-ispettur tenna li l-ġrieħi kienu ta’ natura gravi, l-avukat issuġġerixxa li fil-fatt kienu ta’ natura minuri. Meta qara r-rapport mediku b’leħen għoli, Bugeja qal “Jien qed nara iċ-ċertifikat u dan hu għal grif, grif, grif, barxa u barxa u akkużajtu bi ġrieħi gravi,” sostna l-avukat difensur.
L-Avukat Bugeja informa lill-qorti li arranġamenti biex imur jgħix f’post alternattiv kienu possibbli għall-imputat jekk jingħata l-libertà proviżorja. Il-parti l-oħra kienet ilha ddejjaq lil kulħadd bi storbju qawwi, qal l-avukat. “Meta l-imputat kien ilmenta, il-vittma kien aggredih u l-akkużat iddefenda ruħu, u kkaġunalu grif u barxa.”
L-Ispettur Pulis irribatta l-affermazzjoni li l-ġrieħi kienu sempliċiment brix u grif, u sostna li l-liġi tikkklassifika marki fuq il-wiċċ, li jikkawżaw sfigurazzjoni viżibbli bħala gravi. Il-Maġistrat Azzopardi nnota li d-dinamika tal-inċident ħarġet mid-dokumenti li kellu quddiemu. Il-fatt li l-allegata vittma kien il-ġar tal-imputat wassal lill-qorti biex ikollha tħassib dwar il-kapaċità ta’ Borg li jirrispetta l-kundizzjonijiet tal-libertà proviżorja, qal, filwaqt li ċaħad il-libertà proviżorja.
L-Avukat Bugeja talab lill-qorti timponi projbizzjoni fuq il-pubblikazzjoni tal-isem tal-imputat minħabba fejn jaħdem u ċ-ċirkustanzi tal-każ, li qal li huma trivjali. “Ma naħsibx li jkun tajjeb li jħammġu ismu mal-gazzetti u mbagħad jirriżulta li ma kienx minnu,” sostna Dr. Bugeja.
Din it-talba ma sabitx oġġezzjoni minn naħa tal-prosekuzzjoni. Il-qorti, iżda, iddikjarat li s-sistema tal-Qorti Maltija kienet waħda fejn il-proċeduri jinstemgħu fil-pubbliku, “preċiżament biex iċ-ċittadin ikollu l-opportunità li jsegwi dawn il-proċeduri”. “Anċillari għal dan il-kunċett, huwa l-kunċett l-ieħor li l-proċeduri huma pubbliċi. Għalhekk ir-regola hija li l-media kapaċi, mingħajr sensazzjonaliżmu, tirrapporta dak li jiġri fl-awla u fil-proċeduri,” qal il-maġistrat. “Għalhekk, wara li kkunsidrat dawn il-prinċipji, il-qorti qed tiċħad it-talba,” qalet il-qorti.
