L-artist Patrick Dalli attakka b’mod sever lill-Prim Imħallef Mark Chetcuti f’awla, wara li dan ċaħad appell tiegħu kontra s-sentenza ta’ xhur ħabs mogħtija lil ibnu, Jean Marc Dalli. It-tifel iż-żgħir tal-Kummissarju Ewropew Helena Dalli, Jean-Marc, kien ġie kkundannat il-ħabs fl-2021 wara li nstab ħati ta’ traffikar ta’ ecstasy f’party li kien sar f’Raħal Ġdid fl-2013.
Jean-Marc Dalli kellu 18-il sena meta kien inqabad fil-fatt waqt li kien qed jagħti sitt pilloli ecstasy lil raġel ieħor fuq in-naħa ta’ barra ta’ fejn kien qed jiġi organizzat il-party fil-ħabs il-qadim ta’ Kordin f’Settembru tal-2013. Ir-raġunijiet wara s-sentenza tal-qorti ma ħarġux fis-seduta tas-sentenza, hekk kif l-imħallef qara biss l-aħħar ftit kliem tagħha, li kkonferma s-sentenza ta’ ħabs ta’ Dalli.
F’dak il-punt, Patrick Dalli qam u, b’leħen għoli, indirizza lill-imħallef direttament, u talab li jagħti raġuni għad-deċiżjoni tiegħu u talli dam daqstant biex jiddeċiedi l-każ ta’ ibnu. “10 snin għal deċiżjoni!” qal il-missier, b’referenza għall-istqarrija tal-imputat, li kienet kwistjoni ċentrali fil-każ.
“Messek tistħi minnek innifsek!” għajjat lejn l-imħallef f’awla ppakkjata, fejn tefagħlu biċċa karta mgħaffġa, hekk kif l-ushers tal-qorti għaddew bejn in-nies biex immoru lejn il-missier irrabjat. L-argument kompla billi akkuża lill-qorti li hija parti minn soċjetà sigrieta. “Mafia! Korruzzjoni, Freemasonry u Opus Dei!,” għajjat ir-raġel, b’emozzjoni hekk kif eventwalment inħareġ barra mill-awla.
Anke f’dan il-ħin, l-għajjat tiegħu ta’ “Mafia” komplew jinstemgħu fil-kuruturi.
