Raġel ta’ 19-il sena għadu kemm tressaq il-qorti b’konnessjoni ma’ żewġ każi ta’ omiċidju relatati ma’ sparatura fl-Istat ta’ Virginia.
Is-suspettat, Omari Pollard, ‘il quddiem jista’ jiffaċċja sentenza ta’ ħabs għal għomru wara li spara fuq in-nies li kienu ħerġin minn teatru fil-belt ta’ Richmond ftit wara ċerimonja għall-gradwazzjoni .
L-isparatura ħalliet ukoll ‘il fuq minn ħames midruba – b’raġel minnhom ikun irrappurtat f’sitwazzjoni kritika waqt li l- midruba l-oħra jinsabu l-isptar f’kundizzjoni stabbli.
Għaċ-ċerimonja tal-gradwazzjoni attendew il-mijiet tan-nies – ħafna minnhom studenti – bil-Pulizija temmen li l-attakk kien wieħed ‘premeditat’ u fejn l-aggressur kien indika żewġ persuni speċifiċi li kellu d-diżgwid magħhom.
L-isparatura kaġunat kaos totali, bl-aggressur jispiċċa arrestat wara li prova jaħrab mill-inħawi. Dan meta l-pulizija ma kellhomx għalfejn jużaw l-armi tan-nar fil-ħin tal-arrest u meta r-raġel ċeda ruħu f’idejhom mingħajr reżistenza.
Il-vittmi tal-attakk kienu żgħażugħ ta’ tmintax-il sena li kien parti mill-klassi gradwanti u missieru ta’ 36 sena.
L-aggressur kien fetaħ in-nar fuq in-nies f’Monroe Park, quddiem it-teatru, ftit wara l-għeluq taċ-ċerimonja għall-gradwazzjoni tal-istudenti ta’ Huguenot High School. L-ewwel tiri nstemgħu waqt li l-istudenti u qrabathom – fosthom tfal u trabi — kienu ħerġin mit-teatru viċin il-kampus tal-Università ta’ Virginia u bix-xena tinbidel f’waħda ta’ terrur assolut.
Minbarra l-midruba mill-isparar kien hemm anki xi 15-il persuna oħra li weġġgħu fost il-kaos u li spiċċaw trattati għal xokk ladarba s-sitwazzjoni nġiebet taħt kontroll.
Dan meta l-awtoritajiet f’Richmond għadhom għaddejjin bl-investigazzjonijiet dwar il-mottiv tal-attakk.
//= $special ?>