Fis-26 ta’ Mejju li għadda, trakk li kien qed iġorr madwar 200 litru żejt tat-tisjir waqqa’ il-kontenut tiegħu fuq il-flyover tal-Marsa. Immedjatament ittieħdet azzjoni biex it-tixrid ikun imnaddaf, u b’hekk it-triq kollha kienet miftuħa mill-ġdid għas-sewqan.
Kif suppost kien mistenni, ammont sinifikanti ta’ żejt inxterdet u nfirex ukoll fil-karreġġjata tar-roti. Fis-27 ta’ Mejju, Rota rrappurtat din il-kwistjoni direttament lil Ivan Falzon, CEO ta’ Infrastructure Malta. Rota kienet assigurata li l-problema kienet se tissolva sal-aħħar tal-ġurnata, iżda ma sar xejn.
Fit-12 ta’ Ġunju, Rota ressqet rapport ieħor u għal darb’oħra ngħatat assigurazzjonijiet li l-kwistjoni kienet se tiġi indirizzata. Issa, rapport ieħor intbagħat dalgħodu.
Rota qed tisħaq li l-preżenza taż-żejt toħloq periklu serju, li teħtieġ miżuri urġenti u xierqa biex jittaffew ir-riskji involuti. Huwa kompletament inaċċettabbli li sitwazzjoni perikoluża bħal din tippersisti ġimgħa wara ġimgħa. Irridu nistaqsu lilna nfusna: x’neħtieġu aktar qabel ma nieħdu azzjoni deċiżiva? Barra minn hekk, fejn hu l-kunsill tas-sigurtà fit-toroq f’dan kollu?
