Il-plejer tal-futbol Franċiż Benjamin Mendy se jirritorna fl-awla fir-Renju Unit nhar it-Tnejn għall-bidu tal-proċess mill-ġdid tiegħu għal żewġ allegati reati sesswali, ħames xhur wara li ġurija ħelsitu minn diversi akkużi oħra.
Il-plejer ta’ 28 sena ta’ Manchester City, se jkun mill-ġdid f’Chester Crown Court fil-majjistral tal-Ingilterra biex jiffaċċja akkuża ta’ stupru u attentat ta’ stupru. Il-ġurati fl-aħħar ġuri tiegħu, li ntemm f’Jannar, naqqsu milli jaslu għal verdetti dwar iż-żewġ akkużi li kienu jinvolvu żewġ nisa differenti.
Il-panel ta’ seba’ rġiel u erba’ nisa kien ħeles lid-difensur minn sitt akkużi oħra ta’ stupru u wieħed ta’ attakk sesswali kontra erba’ nisa wara proċess ta’ sitt xhur. L-imħallef f’Jannar kien iffissa data ġdida ta’ proċess għaż-żewġ akkużi li dwarhom il-ġurija ma tatx verdett.
Il-kuntratt ta’ Mendy ma’ Manchester City jiskadi fl-aħħar ta’ dan ix-xahar u huwa rrappurtat li mhux se jiġġedded.
Huwa ċaħad l-akkużi kollha mressqa kontrih.
