Il‑BOV Volleyball Marathon b’risq id‑Dar tal‑Providenza reġgħet magħna bi 53 siegħa logħob bla waqfien fil‑car park tad‑Dar fis‑Siġġiewi. It‑13‑il edizzjoni tal‑Maratona tibda l‑Ġimgħa 30 ta’ Ġunju fis‑6.00pm u tibqa’ sejra sa nofsillejl tal‑Ħadd 2 ta’ Lulju.
Attrazzjoni ġdida din is‑sena hija l‑logħob tas‑sitting volleyball, li huwa adattament tad‑dixxiplina tal‑volleyball li fih jistgħu jieħdu sehem ukoll persuni b’diżabilità. Atleti li jilgħabu mat‑timijiet nazzjonali tas‑sitting volleyball tas‑Slovenja, kif ukoll atleti oħra li jieħdu sehem fil‑Kampjonati Nazzjonali u beach paravolley fis‑Slovenja se jkunu hawn Malta biex jieħdu sehem f’partiti ta’ sitting volleyball matul it‑tliet ijiem tal‑Maratona.
Il‑Ġimgħa, s‑Sibt u l‑Ħadd filghaxija, bejn id‑9 ta’ filgħaxija u nofsillejl, se jkun hemm numru sabiħ ta’ kantanti lokali li se jkunu qed ikantaw fuq il‑palk li se jittella’ apposta fil‑car park tad‑Dar. Il‑Ġimgħa l‑mistiedna se jkunu l‑band Zone 5 flimkien mal‑kantanti Jasmine u J. Anvil. Is‑Sibt hija mistiedna l‑Banda tal‑Pulizija taħt id‑direzzjoni ta’ Mro. Anthony Cassar bis‑sehem ta’ kantanti lokali waqt li l‑Ħadd se jkun hemm il‑band ta’ Spiteri Lucas bis‑sehem tal‑kantanti Ludwig Galea, J. Anvil, Ivan Spiteri Lucas u Laura Bruno.
Il‑pubbliku jista’ jgħin billi jċempel fuq dawn in‑numri li qed nagħtu aktar l‑isfel, juża l‑BOV Mobile Banking jew il‑PayPal jew jagħti donazzjoni online fil‑kontijiet bankarji tad‑Dar. Għal aktar informazzjoni wieħed jista’ jżur is‑sit : www.sabihlitaghti.org
- €10 5160 2011
- €15 5170 2012
- €25 5180 2013
- €50 5190 2070
- €100 5130 2044
- Pledge Line 2146 3686
- BOV Mobile 7932 4834
