Iċ-champion renjanti tal-Formula 1 Max Verstappen kompla l-forma dominanti tiegħu billi rebaħ l-iSprint fil-Grand Prix tal-Awstrija il-bieraħ, biex estenda l-vantaġġ tiegħu fil-kampjonat fuq sieħbu tar-Red Bull Sergio Perez għal 70 punt.
Din kienet il-ħames rebħa konsekuttiva ta’ Verstappen, meta tinkludi l-aħħar erba’ tiġrijiet tal-Grand Prix. Verstappen jibda t-tellieqa propja tal-lum mill-pole position, fejn se jkun qed jimmira għat-42 rebħa tal-GP tal-karriera.
Verstappen akkwista tmien punti fl-iSprint, li rebaħ ukoll is-sena li għaddiet, u Perez kiseb sebgħa biex spiċċa t-tieni. Carlos Sainz Jr. tal-Ferrari ġabar sitt punti bit-tielet post fl-iSprint ta’ 24 dawra. Lance ta’ Aston Martin kiseb ir-raba’ post (ħames punti) qabel sieħbu Fernando Alonso (erba’ punti), is-sewwieq ta’ Haas Nico Hulkenberg (tliet punti), Esteban Ocon ta’ Alpine (tnejn) u s-sewwieq tal-Mercedes George Russell (wieħed).
F’kundizzjonijiet imxarrba u ta’ xita fil-korsa ta’ Spielberg, Perez qabeż lil Verstappen fil-bidu.
Wara li Verstappen u Perez kważi ħabtu ma’ xulxin, Perez imbagħad niżel lura fit-tielet post wara Hulkenberg u Verstappen, li reġa’ ħa l-vantaġġ.
Verstappen ikkwalifika wkoll fl-ewwel post għall-iSprint. Il-format ta’ kwalifika mqassar, magħruf fl-F1 bħala “sprint shootout”, stabbilixxa l-grid għat-tiġrija tal-iSprint, fejn Hamilton beda mit-18-il post wara li ġie eliminat mill-ewwel parti tal-kwalifikazzjoni. Hamilton deher imħasseb hekk kif mexa lura mill-paddock biex jerġa’ jingħaqad mal-garaxx tal-Mercedes tiegħu. Huwa spiċċa fl-10 post fl-isprint.
Il-GP tal-Awstrija huwa t-tieni minn sitt avvenimenti tal-F1 b’format li fih tiġrija Sprint nhar ta’ Sibt. Perez rebaħ it-tiġrija tal-iSprint fl-Azerbaijan.
