Il-weightlifter żagħżugħa Kim Camilleri Lagana kisbet riżultat pożittiv fil-Kampjonati tal-Ewropa ta’ taħt il-15-il sena wara li rebħet tliet midalji tal-bronż fil-kategorija tal-45kg f’Chisinau, il-Moldova.
Il-kategorija ntrebħet minn Kateryna Malashchuk tal-Ukrajna rebbieħa tal-Kampjonati Ewropej ta’ taħt il-15-il sena, b’Bojana Kostadinova, tal-Bulgarija, ittemm fit-tieni pożizzjoni. Madankollu, kienet Camilleri Lagana li ġibdet l-attenzjoni bil-prestazzjoni eċċezzjonali tagħha fil-kategorija tal-45kg.
Fis-Snatch, Camilleri Lagana refgħet b’suċċess 57kilo, daqs l-aħjar riżultat personali tagħha, li kkonferma l-konsistenza u l-kapaċità tagħha minkejja li tkun taħt pressjoni. Fil-clean & jerk uriet li kien mument ta’ konferma għal Camilleri Lagana meta uriet is-saħħa u t-teknika tagħha b’lift notevoli ta’ 74kg, fejn mhux biss rebħet il-midalja tal-bronż iżda stabbiliet ukoll rekord nazzjonali ġdid.
Camilleri Lagana laħqet total impressjonanti ta’ 131kg li mhux biss ratha tistabbilixxi rekord nazzjonali ġdid iżda kien biżżejjed biex tirbaħ it-tielet midalja tal-bronż.
F’Chisinau, Camilleri Lagana’ kienet flimkien mal-kowc nazzjonali u President tal-Malta Weightlifting Federation Jesmond Caruana.
