“Irridu ġustizzja sħiħa. Irridu l-verità kollha. Isabelle għandha d-dritt għall-verità kollha. Hekk biss nistgħu nitgħallmu u nevitaw traġedji simili.”
Dan qalu il-Kap tal-Partit Nazzjonalista Bernard Grech hekk kif il-Ħamis se ssir diskussjoni dwar il-mozzjoni sfurzata mill-Partit Nazzjonalisa dwar it-talba ta’ omm Jean Paul Sofia biex issir Inkjesta Pubblika. Dan sabiex toħroġ il-verità kollha dwar kull nuqqas li kien hemm fis-sit fejn miet traġikament Jean Paul.
Bernard Grech aċċenna għall-fatt illi f’sitwazzjoni normali, il-vot dwar il-mozzjoni jittieħed bi qbil eżatt wara d-diskussjoni .. iżda f’dan il-każ il-Gvern ta’ Robert Abela qed jirreżisti li l-vot jittieħed il-Ħamis stess.
Bernard Grech sostna li għalkemm Robert Abela ma jridx jingħaqad u jaħdem flimkien u irid jibqa’ jimplika ma’ qalb ta’ omm li trid biss il-verità kollha, il-Partit Nazzjonalista se jibqa’ jinsisti sabiex tinstema’ il-karba ta’ omm Jean Paul Sofia utinħatar inkjesta pubblika li tgħin biex filwaqt li tkun għaddejja l-Inkjesta Maġisterjali, ikun assigurat li traġedja bħal din ma terġax tirrepeti ruħha; bil-għan li l-ebda omm ma tgħaddi mill-istess uġigħ.
Jean Paul Sofia huwa iż-żagħżugħ li tilef ħajtu kiesaħ u biered nhar is-Sibt 3 ta’ Diċembru li għadda wara li nqabad taħt it-tifrik tal-binja li ġġarfet f’Kordin.
Kien għalhekk illi l-Erbgħa wara nofsinhar, omm iż-żagħżugħ Isabelle Bonnici kienet barra l-parlament itenni l-appell tagħha kienet barra l-Parlament itenni l-appell tagħha waqt li qasmet ta’ ittra lid-deputati kollha tal-kamra għal Inkjesta Pubblika – bil-għan li toħroġ il-verità kollha u ssir ġustizzja sħiħa.
Meta tkelmet ma’ Net News, omm Jean Paul Sofia sostniet li din il-kwistjoni m’għandhix tintuża bħala ballun politiku.
Dan filwaqt illi fi kliem Isabelle Bonnici, hija biss inkjesta pubblika li tħares sabiex inċidenti bħal dawn ma jerġgħux isiru.
Intant meta Net News staqsa lid-deputati tal-Gvern kif ser jivvotaw fil-Parlament, ħareġ ċar li l-Gvern Laburista ser ibqa’ jsabbat saqajh u jinsisti li ma ssirx Inkjesta Pubblika.
