Ħamrun Bayern komplew bis-serje pożittiva tagħhom fil-kampjonat tas-sajf tal-Malta Darts Association meta kisbu l-ħames rebħa konsekuttiva minn daqstant partiti wara li għelbu lil Birgu Boċċi Club 6-0 fejn kif jindika l-iskor kienet partita li huma ddominaw. Minkejja li Birgu Bocci Club ippruvaw jidħlu fil-partita, il-plejers ta’ Ħamrun dejjem kienu preċiżi fil-punti sabiex kisbu rebħa daqstant kbira.
Fit-tieni post ta’ grupp A telgħu Floriana MCP li kienu impenjati darbtejn fejn wara li rebħu 5-1 lil Leah’s Bar spiċċaw fi draw ta’ 3-3 kontra Birgu Boċċi Club. Fl-istess waqt, Fgura Maypole kisbu l-ewwel rebħa tal-kompetizzjoni meta għelbu lil PO’s Bar 5-1.
Fi grupp B, Team A Fgura baqgħu fl-ewwel post u fl-aħħar partita tagħhom kisbru rebħa ta’ 5-1 kontra Duke’s Bar filwaqt li Juventutis Domus kisbu t-tieni rebħa fil-kompetizzjoni wara skor ta’ 4-2 kontra Top Gun Bar.
