Fir-rapport li ppubblikat ilbieraħ dwar l-għoli tal-ħajja li qed jisplodi, Caritas Malta tefgħet dawl fuq l-isfidi ekonomiċi dejjem qed jikbru li qed jiffaċċjaw il-Maltin u l-Għawdxin. Il-Partit Nazzjonalista jesprimi t-tħassib tiegħu dwar dawn l-iżviluppi u jħeġġeġ lill-Gvern ta’ Robert Abela biex jieħu azzjoni minnufih biex jindirizza l-kwistjonijiet urġenti li jolqtu l-kwalità tal-ħajja tal-Maltin u l-Għawdxin.
Dan ħareġ fi stqarrija maħruġa mill-Kelliem għall-Ekonomija u l-Ħolqien ta’ Setturi Ekonomiċi Ġodda, Ivan J. Bartolo, il-Kelliem għall-Akkomodazzjoni Soċjali u Affordabbli u l-Ġlieda Kontra l-Faqar, Ivan Bartolo, il-Kelliem għal Livell ta’ Għajxien Aħjar b’Impenn Kontra l-Għoli tal-Ħajja, Albert Buttigieg, u l-Kelliem għall-Finanzi, Jerome Caruana Cilia f’isem il-Partit Nazzjonalista.
Skont ir-rapport tal-Caritas, f’Malta, l-ispiża ta’ basket standard tax-xiri żdiedet b’ammont xokkanti ta’ kważi €1,500 mill-2020 għal familja ta’ erbgħa. Din iż-żieda allarmanti turi l-ħtieġa urġenti ta’ intervent biex jittaffa l-piż fuq il-familji u l-individwi, li qed jitħabtu biex ilaħħqu mal-ħajja.
Quddiem dan kollu, u għax jirrikonoxxi kemm is-sitwazzjoni dejjem qed tiggrava, il-Partit Nazzjonalista ilu jtenni li l-Gvern għandu jindirizza din ir-realtà. Sa mis-sena li għaddiet, il-Partit Nazzjonalista enfasizza b’mod konsistenti l-ħtieġa li jkun stabbilit fond nazzjonali li jassisti lill-importaturi u ttaffi l-ispiża għolja tal-loġistika. Dan il-fond jipprovdi l-għajnuna meħtieġa lin-negozji u lill-konsumaturi, filwaqt li jgħin biex jistabbilizza l-prezzijiet u jtejjeb l-affordabbiltà.
Dan jista’ jsir billi jissaħħu s-setturi li kien bena u ħoloq Gvern Nazzjonalista u billi jinħoloq mudell ekonomiku ġdid b’setturi ġodda li jimmiraw xogħlijiet ta’ kwalità u li jħallsu aktar lill-ħaddiema tagħna. Barra minhekk, Gvern ġdid Nazzjonalista jara li l-COLA ma tkunx taxxabbli, filwaqt li jagħti inċentivi fiskali biex jikkumbatti għaż-żidiet tal-għoli tal-ħajja. Dan kollu filwaqt li jiddaħħlu aktar inċentivi biex attivitajiet ekonomiċi li ma jniġġsux ikunu ppremjati.
Barra minn hekk, il-Partit Nazzjonalista jsostni bis-sħiħ li l-investiment fl-iżvilupp ta’ setturi ekonomiċi ġodda u t-tisħiħ ta’ dawk eżistenti hu essenzjali biex tkun żgurata żieda fil-paga medja f’pajjiżna. Meta jiddiversifika l-ekonomija, pajjiżna jista’ joħloq opportunitajiet ġodda ta’ impjiegi, filwaqt li jistimula t-tkabbir f’setturi li għandhom il-potenzjal li jmexxu l-prosperità ekonomika.
Filwaqt li jirrikonoxxi kif qed jevolvi s-suq tax-xogħol, il-Partit Nazzjonalista jtenni wkoll l-appoġġ tiegħu għal inizjattivi ta’ titjib u ħiliet mill-ġdid li jgħinu lill-Maltin u l-Għawdxin jitilgħu s-sellum tax-xogħol. Barra minhekk, meta tingħata prijorità lill-edukazzjoni u jkunu pprovduti programmi ta’ taħriġ aċċessibbli, il-poplu jingħata l-ħiliet u l-għarfien meħtieġa biex jirnexxi fis-suq tax-xogħol. B’dan il-mod, il-kriżi tal-għoli tal-ħajja tista’ tittaffa b’mod effettiv, filwaqt li l-livell tal-għajxien taċ-ċittadini kollha jista’ jkun elevat.
L-impenn bla waqfien tal-Partit Nazzjonalista biex jindirizza l-kriżi tal-għoli tal-ħajja juri d-dedikazzjoni għall-ġid u l-prosperità tal-poplu Malti, kif ukoll li jemmen bis-sħiħ li l-Gvern għandu jaġixxi b’ħeffa u b’mod deċiżiv biex jimplimenta miżuri li jtaffu l-piżijiet finanzjarji li jiffaċċjaw il-familji u l-individwi f’pajjiżna.Fid-dawl tar-rapport tal-Caritas u r-rakkomandazzjonijiet tal-Partit Nazzjonalista, hu imperattiv li l-Gvern jagħraf il-gravità tas-sitwazzjoni u jieħu passi immedjati u konkreti biex jindirizza ż-żieda fl-għoli tal-ħajja f’Malta. Il-Partit Nazzjonalista jinsab lest li jaħdem b’kollaborazzjoni mal-Gvern biex jiżviluppa politika effettiva li tagħti solliev u tiżgura futur isbaħ għall-Maltin u l-Għawdxin kollha.
