Mara li spiċċat f’siġġu tar-roti wara li żagħżugħa qabżet minn fuq wieħed mis-swar tal-Belt u niżlet fuqha ngħatat €190,000 f’danni mill-Qorti. Il-mara kienet bilqiegħda fuq il-bankina barra l-boathouse tal-ġenituri tagħha taħt il-Bastjun ta’ Santa Barbara meta seħħ l-inċident f’Settembru 2008. Il-vittma kellha 40 sena dak iż-żmien. Mill-provi rriżulta li t-tfajla responsabbli kienet ipprovat tikkommetti suwiċidju.
Il-Qorti semgħet li kienu għall-ħabta tal-10pm. meta tfajla ta’ 17-il sena li kellha xi tgħid ma’ l-għarus tagħha fuq is-swar. Iż-żagħżugħa b’rabja tefgħet il-mowbajl minn fuq il-ħitan tas-swar. Imbagħad telgħet fuq il-ħajt ta’ metru wiesa’, biex tipprovi ġġib il-mobile fit-tarf b’periklu kbira għaliha, u wara spiċċat għal isfel, qalet xhud fil-Qorti li rat dak li seħħ.
“Kollox ġara fi ftit sekondi qabel ma kelli l-ħin biex nirreaġixxi,” xehdet il-mara li sostniet li rat lit-tfajla titfa’ lilha nnifisha minn fuq is-swar, laqtet mal-ħitan xi tliet darbiet matul il-waqgħa u fl-aħħar tinżel fuq il-vittma li kienet. bilqiegħda.
F’paniku, ix-xhud immedjatament sejjħet għall-ambulanza. Iż-żagħżugħa malajr irkupra wara dak l-attentat fallut. Iżda l-vittma tagħha qattgħet jiem twal l-isptar u minkejja li għaddiet minn proċess ta’ fiżjoterapija, qatt ma rkuprat il-mobbiltà tagħha.
Qabel l-inċident, il-mara sofriet minn cerebral palsy u epilessija. Madankollu, dik il-kundizzjoni ma żammithiex milli tmexxi ħajja indipendenti. Kollox inbidel wara l-inċident u l-mara, li issa qed tgħix f’dar tal-kura, hija totalment dipendenti fuq ħaddieħor, ma tistax twettaq il-bżonnijiet bażiċi ta’ kuljum u tgħaddi ħajjitha fuq siġġu tar-roti elettriku li tħaddem b’użu limitat ta’ seba’ waħda.
Il-Qorti semgħet li l-ġenituri anzjani tagħha għamlu spejjeż sostanzjali minħabba l-inċident u l-benefiċċji soċjali li kienet tirċievi issa jmorru lid-dar tal-kura. Il-mara fittxet lill-persuna u qalet li l-attentat ta’ suwiċidju tagħha kien wassalha f’sitwazzjoni bħal din. Hija fittxet ukoll lill-ġenituri li kienu responsabbli għat-tifla peress li dak iż-żmien kienet minorenni.
Irriżulta li fil-ħin tal-inċident, iż-żagħżugħa kienet għada kemm ħierġa mill-Isptar Monte Carmeli, u dan disat ijiem biss qabel, wara żewġ attentati preċedenti ta’ suwiċidju. It-tfajla kienet ġiet iddijanjostikata b’‘borderline personality disorder’ li l-psikjatri qalu li kienet ikkaratterizzata minn diversi karatteristiċi fosthom imġieba suwiċidali, mudell ta’ relazzjonijiet interpersonali instabbli u intensi kif ukoll rabja intensa mhux xierqa jew diffikultà biex tikkontrolla r-rabja.
Il-minuri kien ilu taħt kura psikjatrika minn April 2008 wara doża eċċessiva ta’ medikazzjoni. Il-ġenituri tagħha kienu konxji sew tal-problemi ta’ bintha peress li kienu akkumpanjawha fiż-żjarat tat-tobba. Il-Prim’Awla, Qorti Ċivili, ippreseduta mill-Imħallef Francesco Depasquale, osservat li l-ġenituri tat-tifla kellhom jerfgħu parti mir-responsabbiltà ta’ dak li ġara.
B’mod ċar kienu ħallewha toħroġ mingħajr ebda superviżjoni jew kontroll, u b’hekk naqsu mid-dmir tagħhom li jissorveljaw lill-minuri taħt il-kura u l-kustodja tagħhom. Fid-dawl ta’ din il-konklużjoni, il-Qorti qasmet it-tort tal-inċident bejn it-tifla u l-ġenituri tagħha f’60% u 40% rispettivament.
Wara li qieset l-istat attwali tal-vittma, l-ispejjeż li saru kif ukoll xhieda medika li tikkonferma li kienet qed issofri minn diżabilità permanenti ta’ 88%, il-qorti tatha €190,000 f’danni kkawżati min-negliġenza tal-minuri ta’ dak iż-żmien.
Il-Kummissarju tal-Artijiet u d-Direttur tad-Dipartiment tal-Proprjetà tal-Gvern, li wkoll ġew imħarrka peress li l-inċident seħħ fuq proprjetà tal-gvern, ġew iddikjarati mhux responsabbli.
