Neil Camenzuli
PORTUGALL…….. 0
ITALJA………………. 1
Portugall: G.Ribeiro, G.Esteves , A.Ribeiro (L.Gomes 90′), G.Bras, M.Marques (M.Fernandes 46’), N.Felix, C.Borges, G.Sa (H.Nabian 76′), R.Ribeiro, S.Justo (D.Prioste 46’) , H.Felix (M.Fale 83′)
Italja: D.Mastrantonio, F.Missori, I.Regonesi, L.Dellavalle, L.Hasa, A.DellaValle, C. N’Dour (L.Lipani 64’), M.Kayode, P.Esposito, S.Vignato (N.Pisili 79′), G.Faticanti (L.Koleosho 79′)
Imwissija: G.Bras 24’, S.Justo 26’, J.Milheiro 68’ (POR), F.Missori 33’, C.N’Dour 45’, Mastrantonio 90′(ITA)
Skorjaw: M.Kayode 19’ (ITA)
Referee: Sven Jablonski (ĠER)
Assistenti Referees: Rafael Morim (LUX), Robert Kempter (ĠER)
L-Italja għelbet lill-Portugall fil-finali tal-Kampjonat Ewropew ta’ taħt id-19-il sena bl-iskor ta’ 1-0 biex b’hekk rebħu din il-kompetizzjoni għat-tieni darba fl-istorja tagħhom, bl-ewwel unur jasal lura fl-2003, ironikament kontra l-istess Portugall, fejn dak iż-żmien it-Taljani ħarġu rebbieħa bl-iskor ta’ 2-0.
Partita kompletament iddominata mit-Taljani, minkejja l-iskor minimu ta’ 1-0, it-tim imexxi minn Bollini kellu prestazzjoni tajba b’ħafna azzjonijiet u opportunitajiet u kontroll tal-pussess.
Dan kien it-tieni konfront taż-żewġ timijiet f’din il-kompetizzjoni hekk kif diġa ltaqgħu fil-fażi tal-gruppi, fejn f’dik il-partita b’differenza mill-lum, il-Portugall kienu ħarġu rebbieħa.
L-ewwel azzjoni denja ta’ nota waslet wara 9 minuti minn kross preċiz tal-attakkant laterali Kayode lejn Esposito, bl-attakkant ta’ Inter ma jirnexxielux jikkonkludi fix-xibka u jixħet barra.
Azzjoni oħra perikolużi għat-Taljani fit-12 il-minuta din id-darba minn xutt minn barra l-kaxxa ta’ N’dour, bit-tentattiv tal-midfielder jispiċċa barra.
It-Taljani fetħu l-iskor wara 19-il minuta logħob permezz ta’ daqqa ta’ ras potenti tal-attakkant ta’ Fiorentina Michael Kayode minn kross preċiż mix-xellug ta’ Hasa.
L-ewwel għoxrin minuta totalment ddominata mit-Taljani, bit-tim Portugiż jipprova jattakka fuq il-kontrattakk.
It-Taljani għal darb’oħra perikolużi fid-39 minuta minn xutt minn barra l-kaxxa ta’ Luis Hasa, bix-xutt tal-attakkant laterali ikun ċentrali wisq bil-goalkeeper Ribeiro jsalva bla ebda diffikulta.
Luis Hasa b’azzjoni personali oħra fit-42 minuta mix-xellug b’tentattiv ieħor minn barra l-kaxxa, b’din id-darba l-konklużjoni tgħaddi ftit barra.
L-unika azzjoni perikoluża għall-Portugall waslet ftit qabel tmiem l-ewwel taqsima minn freekick mogħti minn Hugo Felix, bil-konklużjoni tal-plejer tispiċċa barra.
L-ewwel taqsima b’saħħita għat-Taljani hekk kif daħlu għal-ħin tal-mistrieħ bil-vantaġġ meritat ta’ 1-0.
It-Taljani komplew fejn ħallew fl-ewwel taqsima, hekk kif fil-53 minuta kien imiss Vignato li jittanta xortih lejn ix-xibka b’xutt fil-baxx, bil-goalkeeper Ribeiro jsalva tajjeb.
Fil-61 minuta save tajjeb mill-goalkeeper Taljan Mastrantonio minn daqqa ta’ ras fil-baxx ta’ Fernandes.
It-Taljani b’azzjoni oħra tajba fid-79 minuta minn kontrattakk veloċi ta’ Vignato, bil-konklużjoni ta’ Esposito tiġi devjata mill-goalkeeper Ribeiro.
L-aħħar għaxar minuti ta’ pressjoni mit-tim Portugiż, bit-Taljani jilagħbu l-logħba tipika tagħhom u jiddefendu tajjeb u jevitaw il-periklu tal-attakki Portugiżi.
Fil-95 minuta l-Portugall kważi ħasdu l-avversarji tagħhom bl-aħħar xutt tas-sostitut Nabian jgħaddi ftit barra mix-xibka Taljana, bit-tim Taljan jikkonferma ruħu bħala c-champions tal-Ewropa ta’ taħt id-19-il sena.
Il-plejer Portugiż Gustavo Sa fuq il-kontrattakk (Ritratt: Josef Fitzpatrick)
Alessandro Dellavalle jikkontrolla l-pussess tat-tim Taljan (Ritratt: Josef Fitzpatrick)
Id-difensur laterali Taljan Missori fl-attakk (Ritratt: Josef Fitzpatrick)
