Ukren li kien maħrub mill-awtoritajiet Taljani, inżamm taħt arrest preventiv wara li kien arrestat f’Malta fuq talba ta’ estradizzjoni. L-Ispettur Roderick Spiteri ressaq lil Petro Palamar quddiem il-Maġistrat Joseph Gatt wara li ġie arrestat bis-saħħa ta’ Mandat ta’ Arrest Ewropew (MAE) maħruġ mill-Italja.
Fil-Qorti, Palamar, ċittadin Ukren ta’ 36 sena, li juża wkoll l-isem ta’ Giorgi Tughushi mill-Ġeorġja, ikkonferma li kien il-persuna identifikata fil-MAE. Huwa ma tax il-kunsens tiegħu li jirritorna l-Italja sabiex jiskonta sentenza ta’ tliet snin ħabs imposta fuqu u fuq ħames irġiel oħra mill-Bulgarija u l-Ġeorġja minn qorti kriminali f’Turin fl-2017 għas-serq minn żewġ appartamenti fil-belt mit-Tramuntana tal-Italja.
Djamanti, ġojjelli u apparat elettroniku kienu nsterqu mill-appartamenti waqt il-break-in li kien sar is-sena ta’ qabel. L-Avukat Noel Bianco qed jirrappreżenta lil Palamar fil-proċeduri ta’ estradizzjoni.
