Is-sħana fil-gżejjer Maltin se tkompli tippersisti hekk kif matul din il-ġimgħa qed nesperjenzaw l-ewwel mewġa tas-sħana għal dan l-istaġun.
Matul il-jum tat-Tlieta l-Uffiċċju Meterjoloġiku ħareġ twissija hekk kif it-temperatura laħqet l-40 grad celcius bl-indiċi UV jimmarka 12. Skont it-tbassir tat-temp din it-temperatura għolja mistennija li tkompli tippersisti hekk kif sa tmiem din il-ġimgħa l-ogħla temperatura se tkun bejn 39 u 40 grad celcius. U f’xi ġranet se tinħass 41 grad jew aktar.
Dan filwaqt li matul il-lejl is-sħana ukoll se tippersisti, hekk kif it-temperatura mistennija tvarja bejn 27 u 28 grad celcius.
Il-pubbliku huwa mħeġġeġ sabiex ma joħroġx fl-eqqel ħin tax-xemx u għal dawk li jħobbu jgawdu l-baħar huwa importanti li wieħed japplika l-krema protettiva b’mod frekwenti. Dan apparti li kulħadd qed inkun imħeġġeġ sabiex jixrob l-ilma; speċjalment persuni l-aktar vulnerabbli.
Madanakollu Malta mhux l-unika pajjiż li qed jesperjenza temperaturi mill-aktar għoljin hekk kif rapporti ta’ sħana estrema qed jiddominaw l-Ewropa kollha.
Fi Spanja t-temperatura laħqet l-44 grad celcius filwaqt li kien hemm rapporti ta’ nirien. Rapporti simili ġew ukoll mill-Greċja u anke mill-Isvizzera.
Kaġun tat-temperaturi għoljin diversi residenzi fil-Greċja nħakmu minn nirien. Barra minn hekk, matul il-lejl li għadda ‘il fuq minn 300 pompier ħadmu qatigħ sabiex jitfu n-nirien li ħakmu il-foresti fil-Greċja b’eluf ta’ persuni li jgħixu qrib din iż-żona kellhom jiġu evakwati.
Għalkemm Sardinja normalment tara temperaturi għoljin fl-istaġun tas-Sajf din is-sena t-temperatura qed tkun aktar għolja mis-soltu hekk kif laħqet is-47 grad celcius. Dan filwaqt li Ruma matul il-jum tat-Tlieta esperjenzat temperatura rekord hekk kif l-oħgla temperatura laħqet it-43 grad celcius.
Il-qofol ta’ din il-mewġa tas-sħana se jkun bejn it-Tlieta u l-Ħamis b’temperaturi li jistgħu jlaħħqu t-48 grad celcius f’diveri pajjiżi madwar l-Ewropa.
U minkejja li lejn tmiem din il-ġimgħa t-temperatura mistennija li tinżel xi ftit rapporti qed jindikaw li l-ġimgħa d-dieħla l-Ewropa mistennija li tintlaqat minn mewġa oħra ta’ sħana.
Iżda l-Ewropa mhuwiex l-unika kontinent li qed jesperjenza sħana estrema hekk kif fl-istat Amerikan ta’ Phoenix għad-19-il jum konsekuttiv it-temperatura qabżet it-43 grad celcius. Flimkien mal-istat ta’ Phoenix … Las Vegas u Dallas jinsabu ukoll taħt allert minħabba temperaturi għoljin.
