Membri tas-CPD qattghu sigħat twal f’ġirja kontra l-ħin sabiex jikkontrollaw in-nar li żviluppa fil-Marsa. Bil-pumpieri jużaw xejn anqas minn 150,000 litru ta’ ilma biex tfew in-nar, bl-użu ta’ għaxar vetturi.
Fortunatament, ħadd ma weġġa’ f’dawn in-nirien.
Filmati miġbura mill-crew tagħna juru li n-nar beda minn zona fejn kien hemm bosta katusi tal-plastik maħżuna…kif ukoll tyres.
Dan il-post jinsab tefa’ ta ġebla bogħod mit-track tal-atletika u mill-korsa taż-żwiemel.
Malli ġie rrappurtat dan in-nar, waslu mal-20 membru tal-Protezzjoni Ċivili, Pulizija, membri tal-AFM, uffiċjali ta’ Transport Malta kif ukoll ambulanzi li assistew lill-membri tas-CPD.
Id-daħna sewda setgħet tidher minn diversi lokalitajiet madwar il-pajjiż. Bid-Dipartiment tal-Protezzjoni Ċivili wissa lin-nies sabiex jevitaw iz-zona.
Aktar tard, il-Korporazzjoni għas-Servizzi tal-Ilma kkonfermat illi kuntrattur tagħha kien qed iwettaq xi xogħol fin-network tad-drenaġġ.
Intqal illi n-nar qered diversi pajpijiet tad-dranaġġ tal-PVC, li kienu se jitpoġġew fit-trinek bħala parti minn dan il-proġett.
Sa issa għadu mhux magħruf x’ikkawża dawn in-nirien, illi ħadu ħames sigħat sabiex intfew.
Il-Pulizija qed tmexxi investigazzjoni…..bl-għajnuna tal-Korporazzjoni tal-Ilma u l-kuntrattur li kien involut fix-xogħlijiet ta’ dranaġġ li għaddejin f’dawn l-akwati.
