Sentenza ta’ seba’ xhur ħabs mogħtija lil Jordan Azzopardi fuq aggressjoni fl-2015 li ħalliet raġel ieħor b’għadmu miksur ġiet revokata għal raġunijiet tekniċi, bil-każ jintbagħat lura l-Qorti tal-Maġistrati biex jingħata sentenza mill-ġdid.
Isem Azzopardi ta’ 34 sena sar sinonimu għall-allegat kummerċ illegali tad-droga f’Malta, wara l-arrest tiegħu fl-2019 fuq akkużi li ħaddem netwerk sofistikat ta’ distribuzzjoni tad-droga fil-pajjiż kollu, li traffika l-eroina, il-kokaina u l-cannabis. Iżda l-problemi tiegħu mal-liġi jmorru lura snin qabel dan kollu.
Fl-2015, Azzopardi kien mixli, flimkien ma’ kompliċi, li darab gravi raġel u hedded lis-sieħba tiegħu, li kiser il-paċi pubblika u li sar reċediv, fost reati oħra. Minkejja li inizjalment ikkontesta l-akkużi, Azzopardi kien eventwalment wieġeb ħati f’Diċembru 2020, Wara 33 seduta fil-każ u tliet snin wara li l-prosekuzzjoni spiċċat tesponi l-evidenza tagħha, huwa kien ikkundannat għalseba’ xhur ħabs.
Inħarġet ukoll ordni ta’ trażżin ta’ tliet snin favur il-vittmi. Fis-sentenza lill-Azzopardi, il-Maġistrat Nadine Lia kienet innotat li l-każ ma kienx sempliċi ġlieda bejn żewġt iħbieb li kienet eskalat bla kontroll, iżda kien “attakk premeditat u ppjanat” fuq persuna li ġiet imfittxija u msawta fit-triq quddiem l-pubbliku, b’tant feroċità li kien spiċċa għarwien fit-triq.
Il-maġistrat osservat li kien hemm ukoll tentattiv biex il-vittma jitkaxkar fil-karozza ta’ Azzopardi biex jissawwat aktar, iżda kien irnexxielu jaħrab. Il-vittma sofra minn għadam miksur u minħabba f’hekk kellu jqatta’ żmien jirkupra l-isptar.
L-avukati ta’ Azzopardi Franco Debono, Marion Camilleri u Charles Mercieca, sussegwentement kienu ressqu appell f’isem il-klijent tagħhom. Fost ir-raġunijiet li fuqhom kien ibbażat l-appell kien hemm żball klerikali dwar id-data li fiha ngħatat is-sentenza oriġinali.
Is-sentenza inkwistjoni bdiet bil-frażi “Illum, 15 ta’ Diċembru 2021,” u spiċċat bi “Mogħtija, illum 30 ta’ Novembru 2021, fil-Qrati tal-Ġustizzja, il-Belt Valletta.” L-Imħallef Neville Camilleri, waqt li iddeċieda l-appell, osserva li l-ġurisprudenza kienet stabbilixxiet li mhux kull impreċiżjoni jew irregolarità f’sentenza tal-Qorti tal-Maġistrati twassal għan-nullità tagħha, iżda nnota li l-Kodiċi Kriminali jelenka l-formalitajiet meħtieġa li kellhom ikunu skrupolożament. osservati f’kull sentenza, li n-nuqqas tagħha jwassal għan-nullità.
“Din l-iskrupolożità fl-osservanza ta’ dawn ir-rekwiżiti mhix sempliċi formaliżmu, iżda hija bbażata fuq il-ħtieġa li s-sentenza tal-Qorti tal-Maġistrati tkun ċara u ma toħloq l-ebda inċertezza f’moħħ l-akkużat fir-rigward tad-dikjarazzjoni ta’ ħtija fir-rigward tiegħu.”
Għalkemm l-indikazzjoni preċiża tad-data tas-sentenza mhijiex waħda mir-rekwiżiti elenkati fil-liġi, il-qrati kienu interpretawha bħala dettall indispensabbli għall-validità tas-sentenza. “Id-data tas-sentenza mhijiex formaliżmu żejjed, iżda parti essenzjali mis-sustanza tas-sentenza, fis-sens li tipprovdi ċertezza ta’ meta ngħatat is-sentenza,” qal l-imħallef, filwaqt li spjega li kien essenzjali li jiġi stabbilit il-perjodu ta’ żmien li fih appell jista’ jiġi ppreżentat, kif ukoll jaġixxi bħala punt ta’ tluq għall-piena tal-akkużat.
Il-kopja tas-sentenza esebita fil-proċeduri kienet tidher korrezzjoni li saret mid-deputat reġistratur tal-maġistrat wara li ġie nnutat l-iżball. L-uffiċjal tal-qorti kien xehed li żiedet il-korrezzjoni, billi bidlet id-data mit-13 ta’ Jannar 2022 għall-31 ta’ Jannar 2022 hi stess, iżda ma setgħetx tiftakar jekk kinitx ikkoreġiet is-sentenza qabel jew wara li ngħatat.
Filwaqt li semma l-ġurisprudenza, l-imħallef iddeċieda li żball bħal dan qatt ma seta’ jittieħed bħala wieħed minuri jew inkonsegwenzjali u ordna li l-imputat jitpoġġa fil-pożizzjoni li kien fiha immedjatament qabel ma ħarġet is-sentenza. Għalhekk is-sentenza ta’ Azzopardi ġiet revokata u l-każ ntbagħat lura lill-Qorti tal-Maġistrati biex terġa’ tingħata s-sentenza.
