Raġel ‘homeless’ u bla xogħol inżamm arrestat sakemm tingħata s-sentenza l-ġimgħa d-dieħla wara li wieġeb ħati li seraq persuni li marru jgħumu hekk kif kienu jirrilassaw ħdejn il-bajja f’San Ġiljan. Iż-żagħżugħ ta’ 25 sena deher quddiem il-Maġistrat Victor Axiaq akkużat li t-Tnejn li għadd filgħodu seraq żewġ turisti fid-Dragonara.
L-Ispettur Zachary Zammit qal lill-Qorti li l-pulizija bdiet tinvestiga l-każ wara li rċeviet rapport dwar is-serqa. Il-vittmi qalu li r-raġel mar lejhom u heddidhom biex jagħtuh dak kollu li kellhom. Huma ma rrappurtawx li raw xi armi fuqu. Huwa telaq b’madwar €100 fi flus kontanti.
Il-pulizija bdiet tanalizza filmati tas-CCTV wara li l-vittmi ddeskrivew lill-ħalliel f’ċertu dettall, inkluż it-tattoo li kellu fuq siequ. Ir-raġel ġie arrestat aktar tard dakinhar. Meta mistoqsi mill-Qorti fejn jgħix, huwa wieġeb: “Fit-toroq”.
Mistoqsi jekk il-ġenituri tiegħu kinux mejta jew ħajjin huwa wieġeb: “M’għandi l-ebda ħjiel, ilni ma kellimhom għal dawn l-aħħar tmien snin”. Huwa ammetta wkoll li żamm lill-vittmi kontra r-rieda tagħhom, li għex ħajja vagabond u li sar reċidiv.
Il-Qorti iddifferiet il-każ għall-Erbgħa meta se tagħti s-sentenza tiegħu. L-avukat Mario Caruana kien avukat difensur.
