Fil-belt ta’ Manisa fit-Turkija, wasal riżultat ieħor pożittiv fil-waterpolo, din id-darba permezz tat-tim nazzjonali ta’ taħt is-17-il sena tan-nisa. It-tim Malti mmexxi minn Anna Goncharenko fl-assenza tal-kowċ Aurelien Cousin, spiċċa fit-tieni post minn Grupp Ċ u b’hekk aċċerta tal-anqas minn post mal-ewwel 12 fl-Ewropa.
Din l-edizzjoni qed timxi bl-istess mod kif ġie organizzat il-Kampjonat Dinji ta’ taħt l-20 sena. Gruppi A u B kienu magħmula mill-ewwel tmien timijiet klassifikati fl-aħħar edizzjoni, bir-rebbieħa tal-gruppi jiġifieri l-Ungerija u l-Greċja għaddew dirett għall-kwarti tal-finali. Id-disa’ timijiet l-oħra parteċipanti ffurmaw Gruppi Ċ u D.
It-timijiet li rebħu dawn iż-żewġ gruppi jilagħbu kontra t-timijiet li kklassifikaw fir-raba’ post ta’ Grupp A u B. Bl-istess mod, it-timijiet li spiċċaw Gruppi Ċ u D fit-tieni post fosthom Malta, jilagħbu kontra min spiċċa t-tielet fi Gruppi A u B. Ir-rebbieħa ta’ dawn l-erba’ konfronti, jiffurmaw il-kwadru komplet tal-aħħar tmienja.
Fl-ewwel konfront, it-tim Malti ħareġ rebbieħ 15-7 kontra l-Iżvizzera. In-nisa Maltin rebħu l-erba’ sessjonijiet u qatt ma kienu minn taħt tul il-konfront, b’Nadya Azzopardi u Zaira Bartolo jiskorjaw it-tnejn erba’ gowls kull wieħed.
Malta mmexxija mill-kowċ Anna Goncharenko, tilfet it-tieni logħba ta’ Grupp Ċ kontra s-Slovakkja 15-5, nazzjon li eventwalment rebaħ il-grupp. It-tim Malti żamm mal-avversarji sa nofs il-logħba sakemm is-Slovakki skorjaw ħames gowls konsekuttivi u għamluha impossibbli biex it-tim Malti jirkupra.
Fil-logħba deċiżiva tal-lum, it-tim Malti għeleb lir-Rumanija 12-9. Protagonista kienet Zaira Bartolo li skorjat nofs il-gowls. It-tim Malti kellu vantaġġ ta’ 4-1 fl-ewwel sessjoni għalkemm sa nofs it-tielet sessjoni l-vantaġġ niżel biss għal 6-5. In-nisa Maltin bdew l-aħħar sessjoni 10-7 sakemm żewġ gowls ta’ Bartolo u Eyla Schembri aċċertaw ir-rebħa għat-tim Malti.
L-impenn li jmiss tat-tim Malti hu għada fis-7.30pm kontra l-Italja jew Spanja.
