Il-Maġistrat Elaine Rizzo ordnat li titnieda inkjesta maġisterjali dwar akkużi ta’ reati serji, fosthom ħtif, ħasil ta’ flus, serq u fastidju li jinvolvu persuni konnessi ma’ No Deposit Cars Ltd. L-inkjesta maġisterjali se ssir fil-konfront tal-kumpanija kif ukoll tar-rappreżentanti tagħha Christian Borg; li huwa ħabib tal-Prim Ministru Robert Abela, Joe Camenzuli eks fotografu uffiċjali tal-eks Prim Ministru Joseph Muscat u tal-Partit Laburista, kif ukoll Luke Milton, Thorne Mangion, James Spiteri u Tyson Grech.
Din se tkun l-ewwel darba li l-kumpanija se tiġi investigata formalment għal reati kriminali wara snin ta’ allegazzjonijiet mill-klijenti tagħha. F’applikazzjoni mressqa mill-avukat Jason Azzopardi f’April li għadda, tnejn mill-allegati vittmi sostnew li ħamsa jew sitt snin ilu, Luke Milton u Christian Borg kienu impjegaw lil “ċittadin Serb jismu Alexander u raġel Malti biex jaħtfu żagħżugħ Malti… biex iġiegħluh jiffirma kambjali.”
Huma jiddeskrivu kif Milton u Borg kienu fittxew li jsegwu l-movimenti tar-raġel Malti. Meta lemħuh xi jiem wara, jgħid id-dokument, ħatfuh, rabtulu jdejh u għattewlu rasu u tefgħuh fil-bagoll tal-karozza, qabel saquh f’garaxx fl-Imqabba.
Hemmhekk, inħareġ mill-karozza, b’rasu għadha mgħottija, u marbut ma’ siġġu spiċċa msawwat sakemm aċċetta li jiffirma t-18-il kambjali li jammontaw għal €18,000. Kien “normali ħafna” li ċertu impjegat ta’ No Deposit Cars jismu Noel jinvolvi individwi Maltin u barranin biex jagħmlu ħsara lil vetturi li kienu mikrija mill-kumpanija sabiex iġġiegħel lill-klijenti tal-kiri tal-karozzi jħallsu l-penali kuntrattwali tal-kumpanija, huma qalu.
Ir-rikors jgħid li l-atturi inkwistjoni kienu konxji wkoll li “Noel” kien ordna li Citroen mikrija mill-kumpanija tingħata n-nar fl-Imsida, xi sentejn jew tliet snin ilu. Allegazzjoni oħra li saret fir-rikors tgħid li Christian Borg kien intlemaħ fil-carpark tal-Ajruport Internazzjonali ta’ Malta, jgħabbi boroż suwed mimlijin flus kontanti fil-karozza ta’ Tyson Grech minn kull ġimgħa sa darbtejn fil-ġimgħa.
Skont il-liġi passiġġieri li jġorru ‘l fuq minn €10,000 fi flus kontanti huma meħtieġa bil-liġi li jiddikjaraw kwalunkwe ammont li jaqbeż l-€10,000 lill-uffiċjali tad-dwana fl-ajruport. L-applikazzjoni tgħid li mill-inqas mis-sena 2019, Borg kien isejjaħ lil Grech mill-parkeġġ tal-ajruport u wara li Grech kien imur ħdejn il-Land Rover ta’ Borg, fejn dan kien jipproċedi biex jittrasferixxi fil-karozza ta’ Grech “diversi boroż suwed kbar, simili għaldawk ta’ l-iskart, iżda mimlija flus kontanti f’karti ta’ diversi denominazzjonijiet tal-euro.” Imbagħad Grech kien isuq minnufih.
“Mingħajr dubju,” tgħid l-applikazzjoni. “Dawn il-basktijiet ikun fihom ħafna, ħafna aktar flus kontanti mill-€10,000 permessi bil-liġi.” “Il-preżunzjoni legali hija li dawn huma u kienu flus derivati minn attività kriminali jew mit-twettiq ta’ delitt u għalhekk huwa impellabbli li minnufih tinbeda inkjesta maġisterjali,” jgħid id-dokument tal-Qorti, li jżid li numru ta’ xhieda huma lesti jixhdu quddiem il-maġistrat inkwirenti. L-Avukat Jason Azzopardi qed jirrappreżenta lill-vittmi.
