Aaron Mizzi ta’ 43 minn Ħal Qormi, inżamm arrestat wara li wieġeb mhux ħati li qarraq b’mara meta ħadilha €4,000 li kienet ħallset għal xadina domestika liema bejgħ qatt ma mmaterjalizza. Fil-Qorti ntqal li l-mara, konoxxenza, kienet semmiet li xtaqet li jkollha xadina domestika.
Mizzi qalilha li kien jaf lil xi ħadd li jista’ jipprokuralha xadina. Għalhekk il-mara volontarjament tat €4,000 għax-xiri. Iżda għaddew ġranet u l-ftehim li tingħata l-pet tagħha naqas milli jimmaterjalizza. Kull meta kienet tfittex informazzjoni mingħand Mizzi, kien dejjem joħroġ xi skuża.
L-iskużi eventwalment qalbu għal theddid u l-kwistjoni ġiet irrappurtata lill-pulizija. Mizzi ġie arrestat u mressaq il-Qorti, qed jiffaċċja akkużi ta’ misapproprjazzjoni u frodi, li nsulenta u hedded lill-allegata vittma u użu ħażin ta’ tagħmir ta’ komunikazzjoni elettronika.
Huwa ġie mixli wkoll li kiser il-libertà proviżorja u li naqas milli jmur l-għassa tal-pulizija meta ġie mħarrek.
Huwa wieġeb mhux ħati. Talba għall-ħelsien mill-arrest ġiet miċħuda mill-Qorti, ppreseduta mill-Maġistrat Victor George Axiak. L-Ispettur Gabriel Kitcher mexxa l-prosekuzzjoni.
