Raġel bil-vizzju tad-droga mixli li aggredixxa fiżikament lil sieħba fid-dar tal-koppja l-ġimgħa li għaddiet inżamm taħt arrest preventiv wara li ffaċċja diversi akkużi. L-inċident allegatament seħħ nhar il-Ħamis li għadda filgħaxija meta l-vittma marret lura d-dar, u sabet lis-sieħeb tagħha jikkonsma d-droga fil-kumpanija ta’ mara oħra.
Inqala’ argument jaħraq u r-raġel allegatament sawwat lis-sieħba tiegħu, u kkaġunalha ġrieħi serji f’wiċċha. Tressaq rapport tal-pulizija u nħarġu akkużi kontra r-raġel ta’ 48 sena residenti Bormla li ismu ġie pprojbit taħt ordni tal-Qorti.
Meta tressaq il-Qorti huwa wieġeb mhux ħati li kkaġuna ferita gravi lil sieħba tiegħu, li uża vjolenza kontriha, inkluż vjolenza morali u psikoloġika kif ukoll li kkaġunaha biża’ mill-vjolenza. Huwa ġie mixli wkoll li kiser il-kundizzjonijiet preċedenti tal-libertà proviżorja u li sar reċidiv.
L-akkużat wieġeb mhux ħati. Saret talba għall-ħelsien mill-arrest li kienet oġġezzjonata mill-prosekuzzjoni u wara li semgħet is-sottomissjonijiet taż-żewġ partijiet, il-Qorti, ippreseduta mill-Maġistrat Victor George Axiak, ċaħdet it-talba minħabba l-biża’ li tbagħbis fil-provi u anke minħabba li l-akkużat ma kienx meqjus. affidabbli biżżejjed. L-Ispettur Sherona Buhagiar mexxiet il-prosekuzzjoni. L-avukati Michael Sciriha u Roberto Spiteri kienu avukati difensuri.
