Fil-kumpless tal-pitch ta’ Sliema Aquatic Sports Club saret tifkira għal memorja tal-eks kowc Beto Fernandez li miet fit-18 ta’ Ġunju ta’ din is-sena. Plejers u uffiċjali tal-klabb ta’ Sliema mmexxija mill-President Frank Testa flimkien ma’ partitarji u membri tal-klabb attendew għall-kommemorazzjoni li saret wara quddiesa ċċelebrata minn Fr. Stefan Attard mal-mużika pprovduta minn Patrick Wirth u Louisa Frendo Wirth.
Beto Fernandez kien ħa t-tmexxija tal-klabb f’Awwissu 2021 wara karriera ta’ 11-il sena fi Spanja fi ħdan Club Natacion Mataro li magħhom fost is-suċċessi miksuba kien hemm finali tal-Copa del Rey u għaddew għall-ewwel darba fit-Trofew LEN.
Fil-perjodu li għamel ma’ Sliema ASC, Beto Fernandez mexxa t-tim fir-rebħ tal-Enemed Cup, Kampjonat tax-Xitwa u t-tieni post miksub fil-Kampjonat tas-Sajf.
Dawk preżenti għall-kommemorazzjoni li saret faħħru l-kwalitajiet sportivi u umani li kellu Beto Fernandez fil-perjodu li għamel ma’ Sliema.
